ein gul knapp

To-do-lister og produktfotografering...

2012-01-25T16:41:00.000+01:00

Det ser ut til at det er fridagen min som også er bloggedagen min for tida. Fridagen som eg har snakka om så mange gongar før, som eg verdset så høgt og som eg har så mange planar for. I dag sette eg meg ned og skreiv ein slags plan over dagen, for å få gjort mest mulig av det eg burde, ville og skulle gjort... Berre det å ha ein plan hjalp veldig, men eg greidde nok ikkje å halde den. Lagar du lister og planar? Eg likar tilfredsstillelsen i å stryke ut noko, vere ferdig med ein ting og kunne begynne på noko nytt. Kanskje fordi eg er best på begynnelsar? :) Eller kanskje fordi eg treng struktur i det (kreative) kaoset eg har rundt meg? Joda, nokre kallar det rot, og det er mulig at det er mest av det og minst av kreativt kaos. Men eg veit ikkje.

Ganske tidleg på programmet stod blogginga lista opp, men før eg kan blogge må eg jo ha nokre ganske ferske bilder. Og eg prøvde å ta bilder i rett lys, etter at sola hadde slutta å skinne direkte inn kjøkkenvindua mine. Og dagens bilder har eg tatt etter tips herfrå. Eg skulle ta produktbilder av dei nye sanseputene som skal inn på Epla, og med den lave sola er ikkje det heilt enkelt... Så no blir det "ny look" på produktbilda mine, og så må eg sjå om eg blir fornøgd. ;) Eg har brukt bakepapir på vinduet, aluminiumsfolie på ei eske som var høgare enn vinduskarmen, og så laga eg ein skjerm av aluminiumsfolie for å reflektere lyset, slik at produktet var best mulig opplyst. Vi bloggarar må vere eit artig skue for nysgjerrige naboar iblant. Hihi... ;)

Kva syns du? Er dette fine produktbilder? Eg syns rett og slett det er ganske vanskeleg å vise fram produkta mine på ein god måte, men dette var vel ikkje ille? Litt mykje speiling i underlaget?

Vi ventar forresten enno spent på babyen... Takk for alle kommentarane og varme tankane! :)

Ha ein fortreffeleg kveld!

Ventetid

2012-01-19T22:27:00.001+01:00

Det er ventetid. Store og små ventar og gler seg og er spente. Når som helst kjem den vesle babyen til kjæraste systra mi, og det er så stas! :) Og medan vi ventar strikkar eg litt. Og syr litt. Og leitar etter fine babyklede frå både Storesyster og Lillebror. Skal tru om det er ei lita jente som kjem? Eller er det kanskje ein liten gut? Og blir det krøllar? Blå auge? Eg gler meg uansett til å bli kjent med deg, vesle venn!

I siste liten blir det teppe frå tante Guro, i alle fall. Eg er aldri tidleg ute med noko som helst, ikkje ein gong når denne babyen er på overtid greier eg å bli ferdig...! Men snart, snart... Teppeoppskrifta fann eg i alle fall i Nøstebarnboka, og garnet er Nøstebarns 2-tråds merinoull i ein superfin blå-grøn-grå farge. Fuglen fekk vere med på bildet, berre fordi eg likar den boksen så godt. ;)

Lukke til, skjønne Gine!

Ein strålande dag

2012-01-17T13:45:00.000+01:00

Ein deilig, inspirerande, glad dose med fargar, mønster og stoff ligg på bordet mitt. Eg er i siget, og nye sanseputer skal etter planen ut på Epla i løpet av veka. Og eg kjem nok til å reklamere her på bloggen når det skjer... ;) Det er så utruleg kjekt å skape desse fargeklattane! Eg lagar jentete, guttete, brunretro, rosaretro, nytt og gammalt, detaljert og enkelt, akkurat som eg vil! Og heile tida har eg babyane i bakhovudet. Kva vil vere fint å sjå på og spennande å ta på? - og kva vil mammaene like..?

Eg kom over eit sitat på Pinterest i dag, via Mokkasin, og eg las det to gongar før eg la det bort. Men så har det altså festa seg litt i meg likevel, og eg vil vise det fram her.

Prøvar du å lage alt rundt deg vakkert? Og får du det til?? ;) Eg skulle så veldig gjerne omgitt meg med berre vakre ting, men slik er det ikkje her i huset. Ikkje berre fins det altfor mange ting som ikkje er vakre her, men det fins rett og slett for mange ting. Det ser i alle fall slik ut når golvet flyt over av togbaner og leiker, bordet er gøymt under bøker, sysaker og tusjar og gangen er full av klede. For å nevne noko. Så nei, her er det ikkje berre vakkert, men det er ein ting eg har tenkt på i dag:

Vi må hugse å legge merke til alt det vakre i kvardagen!

I det store sørvendte vinduet i stova heng det ein vakker fugl. Den er av gjennomsiktig neonrosa plexiglas, eller noko slikt, og er kjøpt på knallfine Liebe i København. Hos Liebe får du knallfin keramikk, men også nokre andre ting. Dessverre kan eg ikkje hugse kva kunstnaren bak denne fuglen heiter... I alle fall, når eg ser den her frå sofakroken, er den verkeleg knallrosa mot den lyse himmelen utanfor, men på bilda med skogen som bakgrunn, er den mørkare. Då eg satt og sydde i dag, la eg plutseleg merke til eit nydeleg fenomen! Sakte, sakte snurra fuglen rundt, og solstrålane sendte refleksen rundt i stova som ein vakker, vakker fugl. Fram med kamera. Catch the moment. Beautiful!

Eit langt blogginnlegg på denne nydelege vinterdagen. Takk for at du er innom her, og tusen, tusen takk for kommentarane! Eg blir veldig glad for dei! :)

Håpar du også nyt dagen!

Eg vil bli ein betre fotograf!

2012-01-13T10:56:00.000+01:00

Det er formiddag, det har begynt å bli ganske lyst, det har komt ein meter med snø på nokre få dagar, og no er himmelen delvis blå! Åh, så godt det er! :) Eg har leika med vårt litt for avanserte Nikonkamera, men det var nok før det vart heilt lyst, og mens det var overskya og snøkave ute... Men uansett; det så mykje å lære! Eg jobbar med saka, og reknar med at før sommaren kjem, så skal eg vere ein betre fotograf enn eg er no! ;) Det er jo veldig mykje lettare å prøve seg fram når ein er heime samtidig som dagslyset, og dessutan har eg funne massevis av gode nettsider eg må lese gjennom. Men bruksanvisninga til kameraet? Nei, takk, det er ikkje noko for meg! :)

Dette bildet var i utgangspunktet altfor gult og kjipt. Litt sånn typisk inne-på-kjøkkenet-i-dårleg-lys! Forstår du kva eg meinar, eller? Eg brukte jo både kvitt kjøkkenbord og sidelys frå vinduet, men likevel... I alle fall, så syns eg dette var ein litt morsom effekt på akkurat dette bildet. Eg brukar gratisprogrammet Picasa, og akkurat denne effekten heiter svart/hvitt-fokus. Eg fjernar fokuset frå kantane, og får fram dei fine fargane på ullkulene, tusjpennane og den fine keramikken. Den er forresten kjøpt på Stilleben (Københavns-yndlingsbutikk), og er laga av Meyer Lavigne. Klikk på navna så finn du meir info!

Treng du gode fototips, så kan du jo for eksempel gå hit, så finn du nok noko du får bruk for! Eller har du kanskje nokre gode råd du vil dele med meg og andre? No skal eg ut og nyte fridagen min. Cafètur freistar veldig, for det er lenge sidan sist! Og om du er i Trondheim kan vi kanskje ta ein kaffe i lag? Send ein e-post eller legg att ein kommentar, om du tør! ;)

Ha ein fortreffeleg fredag!

Lille Lea

2012-01-09T23:08:00.000+01:00

Det er på tide å introdusere ein liten venn som flytta inn til oss i jula... Ho heiter Lea, og eg presenterer meg sjølv som mormora, for her er det nære band, må du vite! ;) Denne hausten gjekk eg på dukkesykurs, og resultatet vart denne mjuke, varme, gode dukka, som eg skulle selge på barnehagens julemarknad. Eg gjekk med hjartet i halsen og augene på stilk i nokre timar, heilt til eg bestemte meg for at henne måtte eg kjøpe sjølv! :) Åh, så glad eg vart!

Til jul pakka eg henne fint inn, og eg fann til og med nokre knallfine, bittesmå babyklær frå då Storesyster var bittebitteliten baby, og så vart ho lagt under juletreet. Gleda var stor då Storesyster opna pakken frå mamma og pappa, og fine dukka låg inni! På bildet har dukka på seg lua Storesyster si mormor strikka til henne då ho låg i kuvøsa og var knapt ein kilo stor, og så har Lea vest, kjole og truse som eg har laga. Og sjølv om trusa vart utruleg søt, så viser vi ikkje fram trusene på bloggen, gjer vi vel..? ;) Om du vil sjå det første innlegget eg laga om dukka, finn du det her.

Dukka er fylt med ull, så ho kjennast alltid varm ut, og ho er mjuk og god. Ofte får ho vere med i senga, eller så ligg ho til pynt i stova. Ho er så fin! ;) Og i ein pose i ei skuff ligg systra hennar, som eg skal fullføre i løpet av vinteren ein gong. Og når det er gjort skal eg prøve meg på Tusindfryddukkene! Har du vore inn på Tusindfryd sin blogg? Det vrimlar av fine, kreative ting og tang der, og det er masse inspirasjon å hente! :) Før jul fekk eg også tak i boka ho nettopp har gitt ut, og den kan du sjå nærmare på her.

Lille Lea har lagt seg, og det har resten av familien også. No er det min tur! -men tenk at det skal vere så skrekkeleg vanskeleg å komme i seng tidleg... Eg nyt seine kveldar med ro og fred i huset, men det er jammen deilig å ligge i senga si også! Dilemma... :)

Ønskar deg ei riktig god natt og ein deilig dag i morgon!

Pinteresting!

2012-01-06T15:18:00.000+01:00

Abstract Kitty by Amy Blackwell

Godt nyttår, kjære venner!

Håpar de alle, både nære, fjerne, kjente, mindre kjente og ukjente, går inn i det nye året med energi, glede og håp! :) Eg ønskar at 2012 skal vere eit år der eg får gjort mykje av det eg vil, bør og må. Mest vil, sjølvsagt. Og så ønskar eg at året skal fyllast av mange gode stunder, menneske med stjerner i augene, inspirasjon og vakre ting, helse, latter, sang og musikk. Så det så.

Tida har atter ein gong flaksa i veg som ein nyttårsrakett, og eg fann ut at bloggen måtte ligge. Det var så mykje anna eg ville gjere! Og dessutan har eg funne ein ny og fantastisk tidstjuv. Ikkje ein slik tidstjuv som kun lar deg sitte att med ei kjensle av at grisar er slemme og fuglar er sterke, eller som oppdaterer deg på kva naboen din på nittitalet åt til middag i går, neida! Dette er ein tidstjuv som gir deg millionar av gode tips og inspirasjon. Har du prøvd deg på Pinterest?

Pinterest er ei slags online oppslagstavle, der du festar bilder du vil ta vare på. Og best av alt, det er ikkje berre bilda som blir lagt der, men dei får automatisk lenke til den nettsida dei høyrer til! Slik blir det på ein måte ei avansert form for bokmerker. Eller forresten, det er slett ikkje avansert, det er superlett! :)

Eg har laga meg fleire pinboards, eller oppslagstavler, om du vil, slik at det er lett å få oversikt. Dessutan følger eg nokre andre pinnarar med same smak og interesser som meg sjølv. Dette er jo heilt genialt på den nye mobilen min! Love it! Og på pc'en har eg lagt til ein pin it button, slik at eg når som helst kan pinne bilder eg kjem over på nettet. Åh, så kjekt! Eg blir heilt hekta!

Eg må jo berre vise fram nokre av pinboarda mine, slik at du ser kor inspirerande det er... Ein lagar sjølv navn til tavlene sine, og sorterer dei akkurat som ein vil. Mine treng faktisk ei lita opprydding snart, for etterkvart som eg legg til fleire bilder treng eg fleire kategoriar for å halde det oversiktleg. Men om du vil ta ein titt inn til meg, kan du trykke på bildet under. Og har du ein Pinterestkonto som eg kan kikke på, må du gjerne skrive det i kommentarfeltet!

No går fridagen min mot slutten, og eg har fått kost meg masse! :) Fleire timar med sytid i dagslys, blogginnlegg og Gurotid. Det gir deilig energi, som eg kan bruke på barna mine i ettermiddag. :)

Happy pinning!

Ønskar deg ein fortreffeleg fredag og ei herleg helg!

Knappekunst

2011-12-17T20:58:00.002+01:00

Fine, fine knappar! Skjøre, vakre og delikate, akkurat som eg likar dei. :) Eg kom over dei på Trondhjems-designernes julemarked for eit par veker sidan, og har enno ikkje bestemt meg for kva eg skal bruke dei til. Dei er jo litt store, så dei hadde nok vore supre som dekor. Kanskje er det på tide å sy litt igjen?

Det er Tiril Havdal som er kunstnaren bak desse knappane, og eg har tidligare vist noko av henne i dette innlegget. Eg likar så godt kunsten hennar, og så er eg veldig fornøgd med den nye gule knappen min. ;)

Det er laurdagskveld, det er fyr i peisen, tente stearinlys, mat i magen, pappaen min er på besøk og det har vore ein verkeleg god dag. Eg er fornøgd!

Håpar din laurdag også er fin!

Stjernefint!

2011-12-15T21:12:00.000+01:00

Eg har kasta meg på trenden med papirstjerner, for det er ein av dei finaste julepynttinga eg har sett på lenge! No har det blitt bretta og ordna stjerner i fleng, og eg fekk endeleg brukt litt av papirsamlinga mi..! ;) Akkurat dette papiret vart kjøpt inn då eg var i København for nokre veker sidan, og eg fekk tips frå fine HOME by Linn. Bloggen hennar er full av vakre bilder og fine ord! Verkeleg inspirerande! :)

I kveld skal eg kose meg og pakke inn nokre julegåver og marsipangodteriet vi lagde til i går. Denne jula er eg ganske godt i rute med julegåvene, men ikkje så godt i rute med julehuset. Må vi verkeleg vaske inni kjøkkenskapa? Og må vi verkeleg rydde bort alle spor av mine kreative utskeielsar? Hmpf! Mannen er nok litt frustrert til tider, og joda, eg er det nok til og med sjølv, for her i huset er det papirrullar, stoffbitar, strikkepinnar, saks og pynteband i kvar ei krå... Vi kan jo kalle det teikn på liv og kreativitet, eller berre kalle ein spade for ein spade og sette i gang storreingjeringa. ;) Det er jammen godt eg enno har nokre fridagar att før jula tar til!

Tusen, tusen takk for alle kommentarar, forresten! Det er så umåteleg kjekt å sjå spor etter deg som har vore innom! Eg blir veldig, veldig glad, rett og slett! :) Takk, takk!

Ønskar deg ein strålande dag!

Heimedag

2011-12-14T11:21:00.001+01:00

Småsjuke barn er slettes ikkje kjekt, men jammen er det koseleg å sitte saman med Storesøster og perle Dronning Fjellrose ein heilt alminneleg onsdag!

Ønskar deg ein god dag!

Koseputer med lavendel

2011-12-05T14:47:00.001+01:00

Eg tar sjansen på å vise fram noko av årets julegåveproduksjon... ;) Denne herlege ugleputa sydde eg i helga, av nytt og gammalt bomullsstoff, med ullfilt på baksida og fylt med vatt og lavendel. Den luktar deilig og beroligande, og kan vere ein god kosekompis for ein liten venn. Augene er teikna på med tekstiltusj.

Kosemonsteret er laga på omtrent samme måten, men er ikkje like feminin i stilen. ;) Ull på framsida og gammalt nytt på baksida. Han har glimt i auget og luktar også heilt nydeleg! Men neida, eg har ikkje stole mannens parfyme... ;)

I dag har eg vore heime med ein småsjuk Lillebror, og har brukt tida til å kose masse med han! Midt på dagen, då fotolyset var på sitt beste, tok han seg ein dupp i vogna, og eg fekk tid til ein liten fotoshoot. Det er jammen ikkje mykje lys her for tida! Julekortbilda lar vente på seg, for vi har nemleg tenkt å knipse dei ute i snøen, men det passar liksom aldri! Men-men, vi er jo aaaldri i rute med julekorta uansett, og kjem vel neppe til å vere det i år heller... Har du julekorta i boks?

Ønskar deg ei god adventsveke!

Reprise på adventskrans

2011-12-02T19:30:00.001+01:00

Fjorårets adventskrans var nesten like heil, og er tilbake på plass på ytterdøra. Eg likar den! Du kan sjå fjorårets kransinnlegg her. Det var forresten kjekt å kikke på fjorårets juleinnlegg, for eg hadde jo mange gode idèar då også! ;) I år som i fjor er planane mange, ambisjonane høge og eg gler meg til "å jule"!

Fredagskvelden byr på sylyst, fredagspizza, sofa og tente lys. Deilig!

Ønskar deg ein fin kveld!

Klokka mi

2011-12-01T12:27:00.001+01:00

Klokka mi. Den viser at sola nettopp har vore på sitt høgste, før den no snart forsvinn bak trea i skogen her. Den viser at tida går ustanseleg, utan at vi på nokon måte kan påvirke farten. Den viser meg kor tid eg skal stresse, kor tid eg kan ta det med ro, kor tid eg bør dra hit eller dit, og kor tid eg skal hente barna på skulen og i barnehagen. Og så viser den litt kven eg er. For mi klokke er min favoritt, og eg fann den på Stilleben.

Det måtte liksom berre bli eit innlegg om tid i dag, syns eg. For det er noko eg stadig reflekterer over, og stresser på grunn av. Denne siste månaden har vore ubegripeleg travel, og slik vil vi jo ikkje ha det! Eg har storkosa meg med mange, mange små og store prosjekt, men har ikkje fått gjort alt som eg gjerne vil ha tid til. No lar eg skittentøyet ligge, hyblekaninene formere seg, kafferestane stivne i oppvasken og leikene flyte. No vil eg blogge, inspirerast, sy julegåver og kose meg! Og om nokre få timar hentar eg dei fine barna mine, og vil nyte ettermiddagen saman med dei! Det er jammen det aller viktigaste!

Igjen har livet og døden vist meg at vi må ta vare på tida vår.

Vi må bruke den godt, for vi veit ikkje kor lenge vi har den.

Håpar du har ei GOD tid!

Waldorfdukka mi

2011-11-11T12:12:00.000+01:00

I dag har eg lyst å vise fram ein liten del av waldorfdukka mi. Er den ikkje skjønn, vel? ;) Neivel, så ser du kanskje ikkje så mykje av den på dette bildet, men det er jo fordi den ikkje er heilt ferdig enno. Men du kan tru den har personlegdom! Og eg har nesten blitt glad i den, eg er i alle fall veldig stolt, og det ligg mange timar med arbeid bak eit slikt produkt! :) I går kveld hadde vi dukkesyerskene hårkveld, og eg kom godt igang med håret. Panneluggen vart ikkje heilt som eg tenkte først, og då slo det meg eit lite kvartsekund; eg kan jo berre feste luggen med ei hårspenne no, og så veks det jo ut etterkvart... ;) Joda, den er som eit bittelite menneske, men manglar enkelte kvalitetar likevel... Hihi!

Vesten på dette bildet er inspirert av denne frå Pickles. Men det måtte sjølvsagt litt justeringar og ein råsjans til, og med tynnare tråd og pinnar og cirka halverte maskeantal, vart den faktisk i perfekt storleik! Jippi! Neste gong skal eg prøve å få den større, slik at den kan passe seksåringen. Veldig fin og superenkel! :)

Såg forresten at inspirerande, flinke og trendsettande Linda/Den Gode Feen har waldorfdukkeplanar også no. Så då blir det kanskje neste trend? Ellers kan du jo kikke på dukkene til Smilerynker eller Tusindfryd eller Fröken Skicklig for å nevne nokon... Så mykje fint! :)

Slik ser arbeidsplassen min ut i dag. Arbeidsbordet er plassert i stovekroken, med sola inn frå sør og skogen som utsikt rett fram. Eg er i julemarkedsmodus, og frydar meg over fridagen min, slik at eg kan halde på heime!

Dukka mi skal bli ferdig til julemarkedet neste søndag. Kom-kom! Det er ein årleg tradisjon i Sommerfuglen Steinerbarnehage, at foreldre og ansatte saman får til ein kjempefin dag, med mykje ulikt til salgs, aktivitetar for barna, god mat i cafèen og fullt av folk i heile barnehagen. Det er ope for alle! Kl. 10-16 i Havsteinekra 7. :) Og om du skulle vere i tvil: det er i Trondheim det skjer! ;)

Trudde du forresten at eg skulle fortelle frå København i dette innlegget? ;) Nei, det må nok vente litt til.. Eg har mykje å fortelle, mykje å vise fram og hadde ei strålande helg! Men symaskina og julemarkedsvarene ventar.

Ha ein super fredagskveld!

Rullegenser

2011-11-03T20:22:00.002+01:00

Lillebror sin nye ullgenser er neeesten ferdig no! (Oi, det var visst ikkje heilt riktig fokus på det bildet... Sorry!) Men uff, så vanskeleg det skulle vere å få den aller siste tingen fin til slutt! Eg har brukt Nøstebarnboka, og har strikka rullegenser, og då står det at det skal heklast ein kant med knappehol i... Har du nokre gode tips til korleis eg skal få det pent? Jaja, det får uansett bli morgondagens prosjekt! Og så må eg sjølvsagt finne dei perfekte knappane også i morgon. Eg har lyst på fiiine knappar fra Snella og Petronella! :)

I dag gjorde eg forresten noko som var både morsomt og lurt! ;) Eg tok med meg sanseputene og øyredobbane mine på jobb, og då gjekk det unna! Takk til gode kollegaer! :) Men no skal det jobbast her, og sjølv om eg verkeleg klør i kreativiteten no for tida, så kan eg ikkje halde på med slikt akkurat i kveld. Og ikkje blogge heller, forresten. Ops! ;) Men eg kjem tilbake, og gler meg til å ta ei real runde i bloggland ein dag snart!

Ønskar deg ein deilig kveld!

Roser til folket!

2011-11-02T10:18:00.000+01:00

Tusen takk for strålande respons og ei mengde gode tips til Købentur! :) Trur vi skal greie å fylle tida og tømme lommeboka... Og forhåpentlegvis fylle på med inspirerande og fine opplevingar og god mat i magen, også! Og eg skal sjølvsagt sjå om eg kan levere rapport her i etterkant av turen.. :)

Det har komt nye, raude epleklokker i butikken min g u r o på Epla. Der finn du no også ei mengde nye øyredobbar med emaljerte roser på. Dei er så skjønne! Løp og kjøp! :)

Storesøster er sjuk og sit framfor tven, og eg sit ved sidan av og puslar. Litt strikketøy og litt blogging, mykje snytepapir og mykje hosting. Ute skin sola og det er ein nydeleg haustdag!

Nyt dagen din, du også!

Tips til Københavntur?

2011-11-01T17:41:00.000+01:00

Foto: Butik Retro Villa/Tia Borgsmidt

Om nokre dagar går turen til København, dette mekka for oss bloggarar... ;) Eg har funne fram til maaange ting eg vil gjere der, men lurer på om du har nokre tips til meg? Heldigvis skal eg reise med to gode venninner, og vi vil få med oss både kultur, kreativitet og shopping, og sjølvsagt også god mat og drikke. :) Vil du sjå kva eg har funne fram til? Klikk på navnet for å komme til heimesida.

Butik Retro Villa - med eit fantastisk utvalg retrotapet og anna godis! (Badstuestræde 17)
H&M Home - kanskje verdt ein titt? (Læderstræde 27)
Notre Dame - dill og dall og småtteri? (Nørregade 7)

Grønlykke - fargerik og retro og søt... (Læderstræde 3 og 5)
Fil de fer - franske loppemarkedfunn (Store Kongensgade 83a)
Workshop Copenhagen - eit kunstnerkollektiv (Studiestræde 16)
Designer Zoo - butikk, verkstad og galleri i eitt! (Vesterbrogade 137)

Foto: Illums bolighus

Casa shop - dansk og internasjonal design (Store Regnegade 2)
Hay CPH - så mykje kult interiør! (Pilestræde 29)
Stilleben - keramikk, glas, tekstil, interiør, smykker... (Læderstræde 14)
Illums bolighus - dansk design og interiør i massevis! (Amagertorv 10)
Solspejlet - antroposofisk butikk (Frederiksborggade 41)
KAiKU - skandinavisk design (Kompagniestræde 8)
Husflid - retro og superkreativt (Blegdamsvej 124)
Louisiana - Museum of Modern Art
Girlie Hurly - fargerikt og fint (Istedgade 99)
Quriosa - gjenbruksbutikk (Rantzausgade 33)

Foto: Grønlykke

Contrast - kjøkkengreier og gåver, trur eg (Hovedvagtsgade 6)
Sømods Bolcher - liten dropsfabrikk (Nørregade 36)
Superlove - både klede og living.. (Nørregade 45)
Stof2000 - stoff og sytilbehør

Det hadde vore veldig kjekt med tips om fine marknader eller galleri vi kunne besøkt, syns eg. Har du nokre butikkar, teater eller museum som du vil anbefale? Eller kva med supre cafèar eller andre spisestader? Mmmm - eg gler meg masse, i alle fall!

Og jada, eg veit at dette vart litt i overkant mykje, men vi må jo ha litt å velge blant. ;) Og dette innlegget er nok veldig for meg og dei to reisevenninnene mine! Men kanskje andre også finn tips her? Eg har i alle fall benytta meg av tips frå BoligLiv og Klikk i leitinga. :) Om du legg att dine beste forslag, hadde eg blitt superglad om du la ved lenke eller noko, slik at eg kan finne fram.. ;)

Ha ein fin kveld!

Lukkeleg mamma

2011-10-30T23:15:00.002+01:00

Eg trur eg må vere verdas heldigaste mamma. Det kjennast i alle fall slik! :) Eg er så umåteleg glad i mine to vidunderlege barn, at det nesten kan kjennast som om hjartet skal sprekke. Det blir varmt og stort og bankar energisk når eg kjenner etter kor glad eg er i dei. Og eg er så stolt! Jada, eg har sagt det før, og eg seier det igjen: det er lov å vere stolt! Det er lov å føle at det de har er heilt spesielt. At banda de har knytta er annleis enn andre sine. At dine barn er dei aller mest vidunderlege i heile verda. :) Det er lov!

Oktober er nesten over, og vi har hatt ein hektisk og fin haustmånad. Dette er den store bursdagsmånaden her i familien, og begge barna har fylt år. Tenk at Lillebror har vore her hos oss i over eitt år alt! Det er jo ikkje til å tru! Åh, så skjønn han er! :) Og Storesøster, som har blitt feira i det uendelege, kan ikkje hugse korleis det var her før han kom ut av magen. Det er rart, det! ;) Store, fine Lillebror og store, fine Storesøster. Dei aller, aller beste eg veit! Dei er jammen vel verdt å feire! :)

Det blir forresten snart ei feiring her på bloggen også. Eg bikkar 100 000 besøk når som helst! Oioioi!! Og dersom Følgerknappen min (Blogger sin...) hadde fungert, så hadde eg kanskje fått fleire følgarar også! Er det nokon som har samme problem som meg der, forresten? At følgarane ikkje viser? Uansett, følgarar eller ikkje følgarar, eg er så veldig glad for at så mange er innom bloggen min! Tusen, tusen, tusen takk! :)

Lavendel + ull = gull

2011-10-24T22:09:00.000+02:00

Det er haust og det er strikketid. Ullgenserane, ullbuksene, bodyar, trøyer og strømpebukser, strømper, luer og vottar...Ja, her i huset har vi i alle fall ull i veldig mange ulike variantar, og ganske mykje av denne ulla er freistande for ein aukande møllbestand. Så då er det berre å kjempe imot!

Eg har tenkt å lage lavendelposar sjølv, men måtte ein tur innom Etsy for å finne litt inspirasjon. :) Kanskje vil du også ha nokre gode idèar? Eller kanskje du rett og slett har lyst å shoppe litt? Etsy er uansett tingen!

- Puter med heklebrikker på finn du hos Namolio

- Kaninen finn du hos Pouch

- Ugla finn du hos Ink me up

- Klassiske lavendelposar finn du hos Gardenmis

Ha ein varm og god kveld!

Har du leita i skuffene?

2011-10-23T20:21:00.001+02:00

Foto: Lena Knutli

Dette er dagen då det i mange norske heimar blir leita i skuffer, krukker og jakkelommer etter småpengar og store setlar. Dette er dagen då vi gir så det svir. Dette er dagen då alle ventar på at nokon skal ringe på dørklokka. Dette er dagen vi har ein felles plan, eit felles mål og eit felles hjarte.

Eg skal snart skru på tven, finne fram tekoppen og strikketøyet og sjå korleis det har gått. Vi ryddar for livet! Norsk Folkehjelp skal få rydde miner og bomber i massevis! Støtt tv-aksjonen her!

Skuffene mine er forresten godt og fint merka. :) Eg har brukt papir frå Rie Elise Larsen, washitape og ein gammal Dymo frå loppis. Likande tape kan du for eksempel få tak i her eller her.

Oi, eg holdt på å gløyme ein ting. Men det er ikkje så viktig, altså. Det er berre det at eg har skifta header på bloggen, slik at det blir litt lunare og varmare her no når vi er inne i den mørke tida. Så får kvitveisen vente til våren igjen.. ;) Håpar du likar deg her!

Ønskar deg ein fin kveld og ei god veke!

2011-10-22T10:20:00.000+02:00

Tusen, tusen takk for all den fine responsen i går! Det strøyma på med meldingar i mange kanalar, og eg er så glad! Det er jo spennande å brette ut heimen sin på denne måten, men tilbakemeldingane så langt har gjort meg veldig fornøgd med at eg gjorde det. :) Det var nokre småfeil i teksten, men ikkje noko eg bryr meg om. Det er likevel nokre som har spurt, så eg seier berre: joda, vi er framleis gift, men dette er nok ingen interiørblogg og du blir faktisk litt ekstra snill her hos meg! ;)

Nye epleklokker er på veg ut i butikken i løpet av dagen!
Både raude og grøne epler! :)

Ha ein fortreffeleg laurdag!

Guro i media!

2011-10-21T09:15:00.000+02:00

Iiiik! Heimen min og meg er bretta ut over fire sider i Hjembilaget til Adresseavisa i dag! Det er jammen utruleg spennande og kjekt og skummelt og gøy.... Eg har grugleda meg til denne dagen, men er veldig fornøgd med resultatet! Tusen takk til fotografen, Lena Knutli, som fekk tatt gode bilder! :)

Beklager bildekvaliteten, men det var dette eg rakk på morgonkvisten før eg spring på jobb. :) Det vart jo maange bilder i avisa, og bloggen er nevnt, så eg håpar det er mange nye som kikkar innom i dag! Legg veldig gjerne igjen ei lita helsing, så eg ser at du har vore her! :)

Så måtte det berre komme eit lite bilderas heilt til slutt... :) Det er forresten utruleg koseleg å sjå kor fint vi kan ha det, når det nesten ikkje er noko rot i huset. ;) Kanskje vi kan gjenskape stemninga før fredagspizzaen i kveld? Åh, deilige, deilige fredagen! :) Nyt den du også!

Ønskar nye OG gamle lesarar velkommen til Ein gul knapp!

Nye sanseputer!

2011-10-20T13:47:00.000+02:00

Hurra, no er nye sanseputer på veg inn i Eplabutikken min igjen! :)

Produksjonen går litt i rykk og napp, men eg storkosar meg med dette! Eg brukar både gamle og nye stoff, nokre strykemerker og mange ulike band. Sanseputene er fyllt med vatt, og når barnet leiker med den kling det forsiktig i ei lita bjelle. Tanken er at desse putene skal vere stimulerande for barnet, og difor brukar eg kontrastar og materiale med ulike teksturar. Når barnet er i 5-6 månaders alder og oppover er sanseputa kjempepopulær, både å ta på, fikle med, sjå på og smake på. :)

Håpar du har ein deilig dag!

Geocaching og kaffekos

2011-10-19T10:56:00.002+02:00

I går var himmelen strålande fin, lyset var varmt og skjønt og temperaturen behageleg. I dag regnar det kontinuerlig i store mengder, det er grått og trist og kaldt. Eg gjer husarbeid, men skal ganske snart fyre i peisen og lage den perfekte kaffe latten. Håpar eg! ;) Og før eg gjer det, vil eg gjerne vise fram nokre fine og forhåpentlegvis inspirerande turbilder. Vi har nemleg oppdaga Geocaching, og syns det er ein kjempefin måte å komme seg ut i marka på. Alle er glade i å gå på skattejakt, og gleda er stor når vi kan opne ein liten, godt gøymt boks, skrive teamnamnet vårt, og bytte ut ein liten dings med ein annan. I desse boksane kan du nemleg finne både det eine og det andre, men mange er veldig små, så skattane er deretter. Storesyster har jubla lenge over ein gammal medalje, og har ofra nokre hårstrekk og småting i bytte.

Lillebror er også glad i å vere ute, heldigvis. Men han må vi jammen passe på, for absolutt alt går i munnen no. Eg har ikkje tal på kor mange haustblad han har hosta og harka på, i det han gjer forsøk på å svelge dei... Når det gjeld bekledning må eg berre få komme med eit godt råd: ull, ull, ull! Ta heller fleire lag med ull, så treng du ikkje ha på så tjukk dress. Tjukke dressar gjer det veldig mykje vanskelegare å bevege seg!

No når mannen har hatt permisjon, har primus og mokkakanne aldri vore langt unna. Han har ein utruleg snerten, liten primus (ja, eg skriv han, for dette er oftast på hans initiativ), som tar omtrent ingen plass. Mokkakanner finnast i ulike storleikar, espressokaffe kan ein ta med i ein liten boks, og ei flaske vatn har ein vel alltid med på tur. Mmmm - til og med eg som ikkje drikk svart kaffe får lyst på. Men nøyer meg med å nyyyte lukta av fersk kaffe. Og minst ein bit av sjokoladen... ;) Deilig!

Ønskar deg ein herleg haustonsdag!

Detaljar gjer heimen unik

2011-10-18T13:31:00.003+02:00

Det er så godt å ha det fint rundt seg! Det er både beroligande og inspirerande, og eg kosar meg i den "nye" stova mi. Ikkje dei heilt store endringane, men det er detaljane som er på plass no, og som får komme til sin rett, fordi det er relativt ryddig rundt dei. Men det er jammen litt av ein jobb å skulle halde det slik! ;) Det bur fire rotekoppar i dette huset, og eg må innrømme at eg er blant dei verste... Heldigvis er eg flink til å rydde! :)

Rundt omkring i huset mitt finn ein fleire ting som gjer akkurat vår heim unik. Nokre av tinga har eg laga sjølv, noko er bruktfunn, andre ting er det ungane eller andre som har laga til oss og nokre ting har eg kjøpt berre fordi eg likte dei. På det øverste bildet ser du eit glimt av bildeveggen i stova, der ein liten kveps har fått plass på ei ramme. Kvepsen og vennene hans kan du lese om her. På peishylla står mellom anna denne vesle geitekillingen vi har fått i gåve frå mormor, og er så skjønn! Saman med nokre soppar frå Søstrene Grene,ei lykt og nokre små vasar med blomster i, lagar den fin hauststemning i stova.

Denne vesle keramikkfuglen sit på lokket til ei fin krukke, og passar perfekt til fargane i gangen. Det er ikkje ei veldig spesiell krukke, men den var tilfeldigvis både søt og billig, så eg kjøpte den. No passar den på dill og dall og småtteri, som ellers ville lagt ein annan plass og slengt, er eg redd. :)

Det vart jammen mange bilder på bloggen i dag, men eg håpar du held det ut.. :) Eg har vore heime i fullt dagslys, og då er det så kjekt å knipse bilder! Og dessutan er det ganske oppmuntrande å gjere noko som tar fokuset bort frå den dunkande kjeven, der det inntil i går sat ein visdomsjeksel... ;)

Krukka med tapetlim har fått merkelapp frå Dymoen eg fann på ein loppis. Likte så godt det litt stramme svart/kvite uttykket! Og det er dessutan veldig praktisk å ha berre bittelitt tapetlim tilgjengeleg til små prosjekt, i staden for å måtte gå i kjellaren etter den stoore dunken i tide og utide.

Keramikkenglane er ei gåve frå verdas beste syster, og er laga av ein Gøteborgskunstnar som eg ikkje hugsar namnet til. Dei heng i ei settekasse på kjøkkenet, og minner meg om Gine, om kjærleik, om englar som passar på oss og om at vi skal vere kvardagsenglar og gode med kvarandre.

Dei siste detaljane er frå bokhylla mi. Dei fleste, i alle fall. Bokhylla er rydda etter fargar, og ved sidan av den raud/rosa avslutninga på inspirasjons- og hobbyhylla mi står ein Hoptimist og gliser med krone på. Herleg! Elefanten er ei sparebøsse, som har ramla i golvet minst ein gong for mykje. Men den er så skjønn, så den får stå, trass manglande øyreflipp og apefjes. Den står på ei papirkledd eske, mellom ein gul og ein raud bunke med romanar. Det er kjekt å lage små utstillingar!

Eg trur ikkje mange andre har det slik heime hos seg som oss. Og eg likar veldig godt tanken på å ha noko annleis, sjølv om eg sjølvsagt blir påvirka og inspirert av andre. Det er vel slik det skal vere? :) Trendar kjem og går, og sjølv om eg ikkje strevar for å halde følge med kva som er siste nytt, så blir nok heimen min sakte men sikkert påvirka av trendar likevel. Heldigvis har vi bloggar og interiørblad med mange ulike stilar, slik at ein kan inspirerast til å finne sin eigen stil, uavhengig av kva reklamen i postkassa seier at du skal like! :)

Håpar du har ein deilig tirsdag!

Kameraveske for ladies!

2011-10-14T10:00:00.000+02:00

Åh, så kjekt det hadde vore å ha ei slik veske! I akkurat denne nydelege gule varianten, og fyllt til randen med fotoutstyr og nødvendig kompetanse... Eg har så lyst å lære meir om fotografering! Og eg har så lyst å ha meir tid til å fotografere! :) Har du lagt merke til at det er skremmande kor fort mengden med dagslys minkar frå dag til dag no? Uff, eg vil ikkje heilt tenke på det. Heldigvis har vi handarbeid, te, stearinlys og evnen til å kose oss! ;) For ikkje å snakke om ein og annan fridag!

For å kikke nærmare på desse kameraveskene kan du enten klikke på det lånte bildet eller gå til Jo Totes her. Denne skal i alle fall opp på mi ønskeliste. Saman med eit lite kompaktkamera. For det er jammen tungt (og litt tungvint) å dra på ei heil veske full av utstyr... ;)

Ønskar deg ein super fredag!

Det er lov å vere stolt!

2011-10-13T16:07:00.001+02:00

Eg har så mykje å vere stolt over! Og eg er verkeleg stolt over mange ting også! Sjølvsagt kan eg skjemme meg og gremme meg og rødme og bli skikkeleg flau over ting eg presterer eller ikkje presterer å få til... Men akkurat no kjenner eg at eg er stolt!

Familien min er det eg er aller mest stolt over. Den fine, vesle familien min og den store, gode familien min. Så stolt er eg at eg meir enn gjerne heng opp bilder av barna mine rundt i huset. Og gjerne bilder dei har laga også, for det er jo verkeleg flotte kunstverk! :) Den nye bildeveggen min i stova er eg også stolt over. Endeleg fekk eg gjort det! Det var jo berre å slå inn nokre spiker og få opp desse bilda! Har du prøvd å lage bildevegg? Kanskje gjorde du som eg; pusla og flytta på alle bilda på stovegolvet leeeenge, før du endeleg fann ein god måte å henge dei opp på. Eg valgte til slutt å bygge opp bilda rundt ei rett linje i midten, på ein måte... Så no håpar eg det skal vere enkelt å legge til fleire bilder når eg vil det. ;) Ja, så er eg forresten litt stolt over at eg plutseleg malte to strøk på denne stoveveggen. Den var eigentleg kvit, men då eg flytta på to store bilder var malinga blitt heilt gul under. Hjelp! Så då stakk eg innom malebutikken i hui og hast, plukka ut ein gråfarge (Zen Hage - litt for lys, trur eg..) og fekk malt to strøk på eit halv døgn. Joda, eg slår til og er effektiv når det trengs! :)

Lillebror har oppdaga gleden ved pannekaker med blåbær, og er stolt over å kunne spise sjølv! Men ikkje på langt nær så stolt som eg er! Min vidunderlege, vesle gut - tenk han fyller snart eit år!

Men kva meir vil eg vise fram i dag? Eg kunne jo nevnt både jobben min, vennane mine, den halvstrikka genseren eller den gode kikertsalaten som ting eg er stolt av, men eg gjer det ikkje. I staden vil eg trekke fram søstra mi. Den flinke, skjønne, snille, gode, omtenksomme, vakre og uttrykksfulle lisjesystra mi. Ho har vore ein del i media på Sunnmøre i det siste, og det er ikkje utan grunn. To nyydelege konsertar har ho hatt no, og vi ventar og gler oss til musikken er å få kjøpt i platebutikken!! Ho fulgte draumen sin og er superdyktig jazzsongarinne. Du kan sjå heile intervjuet på Nrk her, eller lytte meir til musikken hennar her. Eg er så glad i deg, Gine!

Bilda har eg lånt her og her.

No skal eg vere heime aleine i mange timar framover. Det er spennande og rart, men også godt. Eg har faktisk ikkje vore heime aleine på snart eit år! Janome, no kjem eg snart! ;)

Takk for alle gode tilbakemeldingar på bloggen min!

Du gjer meg stolt og audmjuk og glad!

Velkommen inn!

2011-10-12T14:09:00.002+02:00

Endeleg tilbake igjen! Og huset mitt er så fint no! :) Dei siste vekene har vi jobba mykje med mange små og store prosjekt, og eg vil komme tilbake med fleire av dei! Men her er i alle fall eit glimt av gangen og kjøkkenet mitt. Tapeten er til å bli glad av, og passar utmerka inn i den fargeskalaen eg for tida har dilla på. Men kjøkkengardinene..? Tja, dei er jo fine og heimesydde, men no når alt anna er nytt og fint blir det jammen freistande å bytte ut desse også!

Eg har hatt storfint besøk i formiddag, og det var til og med ei dame med kamera som gjekk rundt og knipsa i vilden sky! Åh, som eg gler meg til å sjå resultatet! Dette kjem det også meir om snart, snart...

Det er forresten viktig med litt humor i interiøret, og dagens innslag er plakaten på den ellers så sukkersøte veggen; Freak out and throw stuff! Denne og fleire andre kan du mellom anna kjøpe her.

Hovudet fullt av interiør- og handarbeidstankar. Hendene fulle av ein lite samarbeidsvillig pc. Kjøkkenbenken full av eplepai. Kaffekverna full av nydelege kaffebønner. Huset fullt av fine krokar for skjønne gjestar. Hjartet fullt av kjærleik. Velkommen!

Håpar hausten er snill med deg!

Treng du ei gulrot?

2011-09-27T21:21:00.000+02:00

Av og til må eg berre le av meg sjølv. Og jammen er det berre ikkje eg som ler.. ;) Det kan vere mange grunnar til desse små utbrudda av latter, som plutseleg boblar fram, med eller utan bismak. Kanskje er det fordi eg plutseleg kjem på at fridagen min er i morgon, eller kanskje fordi eg oppdagar at genseren er tatt på med innsida ut? Kanskje er det fordi eg har gått rundt med leverposteiflekk på kjolen heile dagen, eller fordi eg berre fekk tatt på mascara på eine auget og ikkje oppdagar det før eg går på do og ser meg i speglet i pausen min? Kanskje er det fordi eg krøllar meg saman på sofaen og er stuptrøytt, men ikkje orkar å gå ned for å legge meg? Eller så kan det vere som i går... I går lo mannen min av meg, mens eg kanskje var mest oppgitt.

Når eg tenker tilbake på skuletida mi, tenker eg med gru på alle gymtimane. Eg var veldig glad i mange av skulefaga, men akkurat gym var heilt pyton. Ikkje sprang eg fort og ikkje hoppa eg høgt, og aldri vart eg valgt først til noko som helst slags lag. Men å kaste liten ball, det kunne eg.. Uansett, det var jo slik at eg måtte ha gym kvar einaste veke i 12 år, og då lærer ein sjølvsagt nokre teknikkar for å sleppe unna. Vondt i foten, vondt i hovudet, kvalm...etc. Og eg har ikkje blitt dårlegare på unnskyldningar seinare heller. ;)

I går kveld hadde eg ein avtale med ein mann på treningssenteret. Eg var nemleg innom der for ein månads tid sidan, for å få hjelp til å sette opp eit bra treningsprogram no som eg ikkje lenger går til fysioterapeut. Eg har jo hatt eit veeeldig skranglete bekken, og har trent det fast to gongar i veka sidan lenge før Lillebror vart fødd. Men kroppen har jo ikkje akkurat blitt sterkare av all stillesittinga og vondtinga, og no når eg er tilbake i barnehagejobben igjen, er jo musklar og kroppsleg vedlikehald rett og slett noko som berre må til. Difor fekk eg altså sett opp eit lite styrketreningsprogram, som eg planla å gjennomføre minst to gongar i veka. Hah! Eg har knapt vore innom sidan sist, og grudde meg skikkeleg til å møte den skumle treningsmannen igjen i går.. Tenk om han vart streng! Eg satt rett og slett på ein stol her heime, ferdig kledd i treningstøy, og prøvde å snike meg unna.. Hallo, eg er jo vaksen no! Eg måå jo ikkje gjere slikt som eg ikkje har lyst til lenger! Eller..?

Mannen på treningssenteret var ein tolmodig mann. Og eg er ein ærleg person. Og fordi eg sa rett ut at eg mangla fullstendig motivasjon, til trass for at kroppen min skrik etter å bli sterkare, ga han meg eit bra tilbud. Ikkje akkurat ei gulrot, men ein fast avtale. Og eg tenker på at han ikkje er gymlærar, men ein som vil mitt beste. Og faktisk så har eg betalt nok gjennom dei siste fem åra til å ha ein personleg trenar ei god stund, så det må eg berre utnytte... For faktisk er det det han skal vere dei neste vekene. Han ville pushe meg gjennom ein halvtime eller to i veka dei neste vekene, heilt gratis. Og når nokon ventar på meg, då kjem eg. Hjelp!

Og kor kjem gulrøttene inn i bildet? Joda, desse gulrøttene er i miniatyr, henta opp frå kjøkkenhagen. Eg treng gulrøtter. Enten dei er lange og gule, lilla eller kvite, eller som ein premie eg kan unne meg sjølv når eg har gjort noko eg ikkje har lyst til. Som gym. Hehe... Det er vel berre å ta seg sjølv i nakken, eller kva? ;)

Korleis belønnar du deg sjølv?

Håpar du har gode dagar!

Varmt teppe frå varmt hjarte

2011-09-21T22:04:00.003+02:00

Dette teppet har Guro med bloggen m.i.l.c.h.schaum hekla av den mjukaste alpakkaull, berre for å gi det bort til nokon som verkeleg treng det. Eg syns teppet er heilt nydeleg fint, og at gode Guro (joda, det fins fleire gode Guroer.. ;) ) heilt sikkert har eit varmt og godt hjarte også! Og bloggen er verkeleg inspirerande, så ta ein titt innom! Bildet har eg fått lov til å låne av henne.

Eg har tidligare skrive om aksjonen Tepper til Nepal i dette blogginnlegget.

I kveld skal eg kose meg med strikketøy og gårsdagens episode av Grey's. Det er så deilig å synke ned i sofaen i blant, berre for å sløse med tida og ikkje stresse med noko. Og ja, det blir heilt sikkert ein kopp te og nokre tente lys også, for det har jo blitt haust! :) (-og Blogger streika for meg i kveld, men eg har kost meg, altså! Men no er det natt for min del.. Sov godt!)

Ønskar deg ei fortsatt fin veke!

Fager kveldssol lyser...

2011-09-18T21:38:00.000+02:00

Veslejenta mi har litt av ei utstråling! :) - og på dette bildet var pappaen så heldig å fange litt av den.. Eller faktisk har han berre tatt bildet i ein korridor med sterkt motlys gjennom vindauget i andre enden. Det vart litt magisk! Vi har vore på tur i helga, og har fått ein stor dose med musikk, sosialt liv, nye bekjentskaper, lyd og leven. Herleg! - og ganske slitsomt.. ;) Og atter ei veke tar til i morgon, og den har vel omtrent akkurat like tett program som den forrige. Målet for veka er å komme ajour med hus og heim! Eg har forstått det slik at det er mange som kjenner seg att i at kvardagen er både hektisk og intens, og slik skal det kanskje vere.

Takk for at de gir meg både oppmuntring, inspirasjon og pusterom!

Ha ein fin kveld!

Gammalt på nytt

2011-09-15T18:40:00.000+02:00

Eg gjorde ein morsom oppdagelse i dag! På ein liten snartur innom Stoff og stil fann eg dette skjønne stoffet i billigkroken, og det var gøy! Den fine rosebrosja har eg laga for ei stund sidan, og den er laga av dei gamle kjøkkengardinene vi hadde då eg var lita! Ein gong på åttitalet sat mamma og sydde blå kjøkkengardiner, med matchande lampetrekk, og no har stoffet komt på nytt. Det ser til og med ut som det har komt i samme blåfarge, for det eg har berre blitt bleika litt av sola. Brosja er laga etter boka Sikk sakk.

Her ser du rosebrosja liggande på det nye, fine stoffet mitt.

No skal eg springe på eit slags juleverksted. :) På tide å tenke på julemessa!
Ha ein fortreffeleg kveld!

Som ein vind

2011-09-11T20:13:00.001+02:00

Dette er heilt vanvittig! Tida går så fort som ein haustvind! Dagane kjem og går på rekke og rad, og rutinene må vere på plass for at vi skal rekke alt vi må rekke. Det er godmorgonklem og nattakos nesten rett etter kvarandre, det er middag, lekser og barnetv før vi rekk å lande på sofaen. Ettermiddagskaffen blir kald medan Lillebror får kveldsmat, og Storesøster må i seng før vi rekk å lese ferdig eit heilt kapittel. Og så kjem plutseleg helga... Men veit du, den er jammen over like brått som den kom!

Heldigvis er vi ganske flinke til å gjere koselege ting når det passar sånn! Vi har middagsgjestar, går på skogstur eller bytur, vi leikar, les, tullar og kosar. Vi sit inne og ser på fuglane i hagen, eller vi går ut og plukkar haustblad frå bakken. Vi høyrer på musikk og vi lagar musikk. Vi er saman med mange eller med få. Vi er glade, vi kranglar, vi ler. Og når det blir kveld og barna er i seng, ja, då er dei voksne trøytte og slappe og giddalause. Som i kveld. ;) Skjønne mormor er på besøk, pappa har vore på fjelltur i helga og eg har vore våken med Lillebror og soloppgangen. Så no er eg fullstendig slappfisk, og mormor måtte ta kinoturen på eiga hand. Neste gong skal eg vere med på både kino og andre kjekke ting! :)

Desse bilda tok eg på ein trilletur for ei stund sidan, og eg likar dei. Dei har hausten i seg, og eg likar hausten!

No blir det ferske rundstykker til kveldsmat, og strikketøyet får kanskje eit par nye striper i løpet av kvelden. Så blir det natta, og snart er eg klar for ei ny turboveke. Og den er verkeleg turbo! Håpar eg finn tid og ro til litt blogging! Det er så givande å kikke rundt på alt det inspirerande og tankevekkande eg finn rundt omkring, for ikkje å snakke om deilige, gode kommentarar frå dykk til meg. Blir umåteleg glad! :)

Ønskar deg ei inspirert veke!

Crazyblå...

2011-09-05T21:54:00.000+02:00

Altså, eg må berre beklage bildekvaliteten, som i min iver på å vise fram kveldens ugjerningar (?) vart så stusseleg... Åh, hjelpe meg for ein crazy blåfarge! I alle fall på ein vegg! ;) Her i heimen er vi jo glade i å få det fint rundt oss, men vi er enten veldig treige eller veldig impulsive, og sjeldan noko midt i mellom. Denne gongen var vi også ganske treige, heilt til det plutseleg vart kjøpt inn ein farge i dag. Og då kom den på veggen! Fargen er ein nyanse lysare enn den blå Tripp trappen du kan sjå her, men den er nok framleis cirka sju nyansar for mørk og skarp... ;) Eg trur nesten vi må ha enda ein boks med blåmaling, så får eg kanskje den lyseblå som er i tapeten? Eller skal eg berre gjere det blå feltet litt mindre..? Vi får sjå. Litt vegg blir kanskje kvit att i morgon. :) Tapeten er forresten verkeleg til å bli glad av, og den har eg kjøpt her.

Ikkje fullt så crazy, men ganske blå er desse fine skinntøflane. Eg må berre dele dette tipset, for slike skinntøflar er nesten eit must i barnehagen. Dei er gode å ha på, sit godt på foten, er sklisikre og lagar lite støy. Og dessutan så får du dei nesten gratis hos Shoeszoo! Rask levering frå Canada er det også! :) - og berre for ordens skuld: eg er ikkje sponsa, men måtte betale for dei tre para eg kjøpte.. ;)

Malebuksa er framleis på, og eg må snart ut i gangen og kikke litt igjen. Hjelpemeg, kva har eg gjort? ;) Hihi!

Håpar helga di var god, forresten! Her vart Lillebror forkjøla og hadde feber, men no er han betre att, så kanskje denne natta kan by på litt kvalitetssøvn? ;)

Ha ei fin veke!

Hausthagen og den trøytte mammaen...

2011-09-02T21:29:00.000+02:00

For ein deilig dag dette har vore! Ein bonusdag. Ein kosedag. Ein haustdag. Ein sommardag. Ein kviledag. Ein vaskedag. Ein fotodag. Ein fridag. Ein fredag. Kjært barn har mange navn... ;)

Etter ei ganske slitsom natt, med ein gut som aller helst vil ha smokken heile natta, var det både godt, luksus og heilt nødvendig å ta det med ro i dag. Smokken til guten heng nemleg fast i mammaen, og mammaen orkar ikkje å ha nokon hengande i puppen heile halve natta. Dermed ligg guten i senga si og hyler, medan mammaen og pappaen blir surare og surare, både på han og på kvarandre... Ikkje fordi vi vil det, og ikkje fordi vi syns vi burde det, men rett og slett fordi det faktisk er midt på natta, og vi er desperate etter søvn. Kroppen gjer nesten vondt, fordi den så gjerne vil ligge og kvile, og hovudet er tungt og fylt av bomull. Vil sove! Noo! Men greier vi å komme oss tidleg i seng om kvelden? Neida...skal berre, først...! ;) Kjenner du deg att, eller?

Så no forstår du kanskje kvifor eg har sett så stor pris på denne dagen. Min eigen fridag. Eg har kosa masse med Lillebror, leika, tulla og hatt GOD tid saman med den skjønne guten min. Heldigvis er han så skjønn, så er han tilgitt så snart klokka bikkar sju om morgonen... ;) Han er jo GULL! - og takk og pris søv den fantastiske storesøstra så vanvittig tungt om natta, så ho våknar ikkje av nokon ting. Heldigvis!

Etter ein liten trilletur i formiddag, rusla eg litt rundt i hagen med kamera. Ja, no høyrast det nesten ut som hagen vår er stor som ein park, men det er den altså ikkje. Det er ein liten hage, men faktisk ganske romsleg for rekkehushage å vere. Vi likar den! Og endeleg kan eg no vise fram det fine utebordet vårt, for det har eg vel ikkje gjort før? Dette bordet snekra flinke mannen til 17.maifesten vår, men så var det så dårleg vèr at hagefesten måtte vere i stova, og det store bordet fekk stå der ei stund. Men etterkvart fekk vi flytta det ut i hagen, og eg mala det i ein nyydeleg lillagråblå farge. Føtene til bordet kjøpte vi på Ikea, og inspirasjonen fann vi hos Stylizimo. Herleg! Og faktisk så vellukka at vi vurderte å lage eit liknande til kjøkkenbord også..

Eg leika meg med kamera og macrolinse i dag. Og vart ganske fornøgd med humlebildet mitt! Sjå også dei fine biebilda til The Brekkevolds her. :) Mi humle fann eg i kjøkkenhagen, der den susa rundt på det eg trur må vere ein timian, om eg ikkje hugsar feil. Desse roseknoppane fann eg også, og eg syns dei ber preg av at sommaren er på hell. Eg lurer på om dei rekk å bløme før det blir for kaldt?

No skal eg hjelpe Poirot å løyse ei sak, medan ullgenseren til Lillebror får vokse på strikkepinnane.

Ønskar deg ei nydeleg helg!

Waldorfinspirasjon

2011-09-01T21:19:00.000+02:00

For ei vidunderleg skattekiste Etsy er!! Her kan eg bruke timesvis på å sjå dei nydelegaste ting og samtidig suge til meg enorme mengder inspirasjon! Når eg ser slikt får eg lyst til å sette meg å pusle med ting med det samme, og tanken på at eg for eksempel aldri har prøvd nålefilting før skremmer meg ikkje... Men eg er jo litt realistisk også, og erfaringane mine viser at eg faktisk ikkje får til alt så pent som eg forestiller meg det. I tanken ser det jo så fint og enkelt ut, men det er faktisk ganske mange ting eg heller burde kjøpe på Etsy. ;)

Inspirasjon og skaparglede er gratis, heldigvis, men takk og pris for at det finnast kunstnarar der ute som kan lage nydelege ting til oss. La oss støtte dei og faktisk handle litt av og til, enten via Etsy eller Epla... Og syns du det er vanskeleg å finne fram? Du kan jo bruke søkeord, og gå ut ifrå dei bilda som du blir tiltrekt av. Og så går du vidare via favorittar. :) Lukke til!

Denne gongen søkte eg på Waldorf, og det er av den enkle grunn at eg i år sit i julemarkedskomitèen i Steinerbarnehagen vår. Vi skal jobbe for fullt dei neste månadane med å produsere, delegere, inspirere, motivere og lage til tidenes beste julemarked! :) Det er kjempekjekt!! Her kan du sjå dukkene eg laga til fjorårets marknad. Kanskje blir det liknande også i år? Du skal uansett få følge med på framgangen med dette enorme prosjektet som ein julemarknad er!

Eg kunne komt med veldig mange fleire forslag til butikkar å stikke innom, eller eg kunne valgt nokre heilt andre. I dag fekk du i alle fall eit lite utvalg, og eg håpar du kikkar deg litt rundt! :) Kos deg!

Tusen takk for alle superkoselege kommentarar eg får! Eg er innom kvar og ein av dykk innimellom, men tida mi strekk ikkje heilt til når eg planlegg å skrive ei helsing tilbake... Skal prøve å bli flinkare til det!

Ønskar deg ein super torsdagskveld!

For meg startar helga no, og det er deeeilig!!

Kreakroken...

2011-08-28T21:50:00.000+02:00

Eg har endeleg fått meg ein liten kreakrok på kjøkkenet, slik at eg slepp å okkupere kjøkkenbordet i dagevis i slengen.. :) Nytt og mindre kjøkkenbord ga plass til ein liten pult, og som med bordet var også den eit funn frå låven hos svigers. Jippi! :) Beklager dårlege bilder, men vi går absolutt mot hausten og mørket kjem snikande tidligare og tidligare for kvar dag. Sånn er det berre. Det fine med det er stearinlys og deilig te..

Det manglar enno stikkontakt ved pulten min, men skøyteledninga funkar greit enn så lenge. Og Lillebror eeelskar ledningar, så han syns den var stor stas. ;) Uff, vi må verkeleg passe på han og ledningane i huset heile tida! Han halar og drar og spis på alt han kjem over. Berre i dag har eg fjerna to dottar med vatt, eit klistremerke med ei mus på og litt bark frå munnen hans... Skal tru kva eg ikkje rakk å fjerne før det gjekk i magen..?

Kjolen som vart ferdig i dag var ganske stor suksess hos Storesøster, som sjølvsagt ville ha den på seg på skulen i morgon. Det er så kjekt når ho likar det eg lagar! Og det er så kjekt å lage noko fint!! :) Arkitektlampa er forresten ein original Luxo, som eg fann på ein loppis. Akkurat ein slik som eg ville ha!

Og denne Hoptimisten heng over kjøkkenbordet, til stor glede for store og små!

Ja til leikne detaljar i heimen!!

Håpar du har det godt!

Gjer eit Eplakupp! :)

2011-08-25T21:10:00.001+02:00

Eg har så lyst å gi noko tilbake til skjønne lesarar, blide kjøparar og andre gode folk,

og i tillegg må eg jo nesten feire at eg har solgt meir enn 100 produkt på Epla! :)

I grunnen har eg jo tenkt ei stund på at det er på tide med eit blogglotteri igjen,

men eg er litt treig, så akkurat det tok visst litt for lang tid denne gongen. Men det kjem, det også! ;)

Og medan du ventar kan du jo ta ein titt inn på Eplabutikken min HER,

for der vil du få 30 % rabatt på ordren din

om du skriv EINGULKNAPP i kommentar til selgar.

Avtalen varer ut august! Løp og kjøp! :)

No følger eit aldri så lite bilderas, for å vise fram nokre av produkta som ligg eller har lagt i butikken. Enjoy!

Ha ein fin kveld!

Haust i lufta

2011-08-23T16:55:00.000+02:00

Det kjennast definitiv ut som hausten har komt til Trondheim.

Riktignok varmar solstrålane enno, men lufta er klar og skarp,

og lyset og lukta og alt fortel meg at hausten er på veg.

På tide å gjere ferdig ullstrømpene til Lillebror.

Strikka i deilig, mjuk og varm alpakka, etter mønster frå Myk start.

Ei fantastisk strikkebok for gravide og andre som vil strikke smått!

Nyt dagen!

Førsteklasses!

2011-08-22T20:31:00.000+02:00

Dette er ein heilt spesiell dag. Ein dag med mykje spenning, mykje glede, sommarfuglar i magen, nye vennar, fine klede, gode smil, deilig kake, pannekaker til middag, strålande skulejente som boblar over av alt ho så gjerne vil fortelle. Om den nye, raude boka ho fekk av læraren. Om sangen dei song i Lykkekroken (ja, det heiter nok Lyttekroken, men eg syns Storesøster sin versjon, Lykkekroken, var eit godt alternativ...). Om å rekke opp handa når ein skal på do. Om jenter med rosa klede med stjerner på. Og om så veldig mykje anna!

Tenk at vår vesle jente har begynt på skulen! Det høyrast akkurat ut som ein klisjè, men det er jo faktisk akkurat slik, at eg blir forundra og overraska og nesten overvelda over kor fort tida går! Denne jenta som skulle komme til jul i 2005, og som plutseleg kom ein deilig, varm dag i begynnelsen av oktober. Lita som ei dukke var ho den gongen. No er ho stor og frisk og glad og flink - og skulejente! Eg er umåteleg stolt av henne, og eg håpar eg er flink nok til å vise henne kor glad eg er i henne og kor mykje ho betyr for meg! Mi eiga vakre, vesle jente!

Dagen starta altfor tidleg her i huset i dag, og medan eg tok igjen litt av den søvnen eg gjekk glipp av i løpet av natta, var Lillebror og pappaen i full sving på kjøkkenet. Og Storesøster hadde vore på badet og stelt seg og kledd på seg første-skuledag-kleda sine før ho kom og vekte meg. (Åh, tenk om ho kunne vere så rask på badet kvar dag!) Så vart det frukost og koseleg morgon før vi gjekk til skulen. Alle fire var med, og Storesøster gjekk fremst med den knalloransje sekken sin. Alle vi møtte langs vegen smilte til oss, og forstod nok at dette var høgtideleg og kjekt! :) Skulejenta var eksemplarisk, og vi foreldra var såpass til overs at vi gjekk heim og tok lunsj medan ho var på skulen. På Mikalsen Bakeri får vi kjøpt ferske, gode horn, og vi er så glade for at dei har opna filial rett rundt hjørnet! Og etterpå henta vi jenta vår igjen, og tok henne med til byen for å feire på akkurat den cafèen ho ville på. Mmmm...godt! Sjølvsagt vart det også pannekaker til middag, og før vi visste ordet av det låg far i huset så lang som han var på kjøkkengolvet og sov... Stakkars. Sliten, han! No har freden senka seg i huset, og eg nyt det. Strikke, lese, male eller blogge i kveld, skal tru?

Det er ikkje berre Storesøster som har fått nye klede i det siste... Eg prøvde å ta bilder av meg sjølv i speilet i dag, men endte opp med dette som ho tok av meg. For eg vil jo gjerne vise fram det nye skjørtet mitt! Det var så enkelt og kjekt å sy, at eg slett ikkje ser bort i frå at eg lagar nokre til. :) Alltid kjekt å ha! Dette er sydd av mørk, ganske kraftig dongeri frå restekorga på Stoff og stil, og er pynta med ei lomme og sjølvlaga kanteband. Eg har ikkje brukt mønster, men la berre eit fint og passeleg skjørt rett på stoffet og teikna rundt. Så klipte eg og sydde. Linningen vart berre sånn cirka, og må nok finjusterast litt til neste gong. Denne gongen valgte eg berre å sy på litt stoff for å gjere det pent, og så sette eg i litt strikk akkurat bakerst, slik at det skulle henge på rompa, på ein måte..

Jaja, latskapen lenge leve! ;)

Puh - for eit langt innlegg! :)

Lovar at morgondagens berre blir eit bittelite eit..!

Eg veit allerede kva eg vil vise fram, nemleg.

Håpar din dag også har vore super!

Blått og grønt og sånt...

2011-08-21T20:02:00.001+02:00

Det er så utruleg deilig at det er helg! :) Eg prøvar å slappe av og ha masse overskot til ungane, men har litt for mange ballar i lufta, trur eg... I alle fall har eg ei lang, lang liste med ting eg vil ha gjort! Og jammen har eg ikkje fått gjort både det eine og det andre denne helga også, parallellt med barneleik og koselege besøk!

Då eg opna ytterdøra heime etter jobb på fredag, vart eg møtt av ei vidunderleg lukt av ferske bollar. O Lukke! :) Då hadde mannen baka skulebollar med heimelaga vaniljekrem og handknust kardemomme, og oppskrifta hadde han funne i denne inspirerande bakeboka av M. Schakenda. Det var så utruleg godt! Og så var det så skjønt å komme inn døra når det lukta så godt inne. Heile atmosfæren i huset blir annleis når det står fersk gjærbakst på bordet! :) Ja, så no håpar eg sjølvsagt at dette er den nye fredagstrenden...

Bordet er forresten ei historie i seg sjølv. :) Dette bordet fekk vi nemleg i sommar, då vi fann det på låven heime hos svigers. Det har stått i Farmorhuset, før det flytta inn til sauane... Det er knallfint, og har to ileggsplater som vi håpar vi får brukt mykje! ;) Men det krevde ein del jobb, for sånne halvvegs vraka bord som ligg på låven, har det sjeldan så veldig godt der... Så vi begynte med ein liten pussejobb, før det vart måla med heftgrunn og tre lag sperregrunn. Då kom ikkje lenger beisen gjennom malinga, så då var det på tide med ytterlaga. Vi brukte vanleg, kvit interiørmaling, og sjølve bordplata fekk to strøk. Då såg den veldig fin ut, altså! :) Men no er den ikkje så fin lenger... Kaffe lagar flekkar i malinga med det samme den kjem på bordet, og det er også andre ting som alt har laga merker. Isj! Har du gode råd? Skulle vi brukt golvmaling eller noko? Eller skulle det vore lakka på toppen?

Tripptrappstolane er også nymåla. :) Ein grøn og ein blå. Herleg! No går det i grøn-blå-turkise nyansar i heimen her, og eg er fornøgd! - men ikkje heilt ferdig enno.. Tusen takk til Karen Klarbæk for masse inspirasjon!! Eg har ein slags mistanke om at det er ho som står bak fargane på ulike, nydelige produkt frå Søstrene Grene... ;)

Ho står bak enormt mange gode idèar på bloggen sin også!

Fleire glimt frå hus, heim og kreaprosjekt kjem etterkvart! No skal den nye plassen min i kjøkkenkroken innviast ganske snart, trur eg..! Og forresten - såååå glad for koselege kommentarar! Takk!

Fargekodane til stolane vart etterlyst, så dei kjem her:

Vi fann ein mugge frå Ikea og ei skål frå Søstrene Grene i nyansar vi likte,

og i malebutikken brukte dei eit apparat som kunne gi riktig oppskrift på fargen. Genialt!!

Det vart ingen enkel fargekode av det, men på etiketten på boksen står resepten:

Den grønne: B-base, BV009 GI010 SV009,5 (009 1/2)

Den blå: Hvit-base, BS008 FS003,5 (003 1/2) SV009,5 (009 1/2)

(Vart dette forståeleg? Får ikkje til å skrive 1/2 med små teikn,

men det er eigentleg det som står, og ikkje -,5!)

Ønskar deg ei fin og god veke!

Trøyste og bere...

2011-08-17T15:18:00.000+02:00

Kvardagen har verkeleg innhenta oss!

Tenk, plutseleg har eg begynt på jobb igjen, etter eit laangt fråvèr. Og når nokon spør korleis det er, svarar eg som best eg kan. For eg ER ambivalent! Ja, det er godt å vere fagleg bevisst og bruke den delen av hovudet igjen, men det er også skrekkeleg slitsamt! Eg lengtar konstant etter Lillebror, og skulle så gjerne vore lenger heime med han! Han har blitt over ni månader no, men er framleis berre ein liten kosegut! Okey, han er ein ganske aktiv kosegut...men kos, i alle fall! Og det er den heldige pappaen sin tur å vere heime ei stund framover no. :)

Veldig fint for dei, og ganske tøft for meg..

Heldigvis har eg ein fridag kvar veke, og det er luksusdagen min! Den skal eg bruke så godt som eg kan!

Mykje tid saman med dei to herlege barna mine, litt tid på å få det fint rundt meg og litt tid på å vere kreativ og skapande! Denne planen bør vel vere gjennomførbar, vel? :)

På bildet har eg Lillebror tett inntil meg i den supre Manducaen vi kjøpte hos Krusedull før ferien. Den har vi brukt mykje, og den er enkel å bruke, lettvint å ta med seg og så kan eg halde han såå nær meg! Deilig! :)

Ein skjønn bukett med dahlia pyntar stovebordet og dei nymalte tripptrappane står ved det fine, nymalte kjøkkenbordet, og eg NYT fridagen min! Kanskje blir det litt fotografering i dag? Kanskje nokre runder med malekosten på veggane i gangen? Kanskje lese litt faglitteratur? Eller kanskje berre vere... :)

Ønskar deg ein god onsdag!

Fantastisk blogglotteri!

2011-08-11T18:50:00.000+02:00

Du kan enno rekke å bli med på dette lotteriet!

Min pc-frie ferie gjorde at eg nesten gjekk glipp av sjansen,

men no kryssar eg fingrane og åpar på det beste!

Du kjem til lotteriet her!

Favorittbloggen bareWunderbar kan du nyte her!

Ha ein deilig kveld!

Dear Photograph

2011-08-10T16:38:00.003+02:00

Dear Photograph, If I could turn the corner in 1942 and walk right into my mother, I’d ask her “May I walk beside you one more time?”
Love, Your Daughter

Bilde og tekst er lånt frå Dear Photograph

Berre eit lite tips - eg fall i alle fall verkeleg for denne idèen: Ta bilder av fortida i notida!

På denne sida kan du finne massevis av morsomme, tankevekkande og fine bilder. Og eg likte spesielt godt dette som du ser øverst her hos meg. Men for min del skulle det ha vore mormora mi. Tenk om eg kunne møte henne på gata då ho var ung. Eg skulle så gjerne holdt ho i handa og fått ho til å fortelle om livet sitt! Eg vil så gjerne vite meir om kven ho var og korleis livet hennar var. Ho hadde ikkje eit enkelt liv, men fekk umåteleg stort ansvar då ho var berre 14 år. No er det mamma mi som vidareformidlar mormor si historie, slik det blir mitt ansvar å vidareformidle deira historier til mine barn og barnebarn ein gong i framtida.

Håpar eg har mange historier å fortelje!

Tusen takk for gode tilbakemeldingar i går!

Blir så umåteleg glad for responsen!! :)

Ta vare på dagen!

Godt å vere her!

2011-08-09T09:30:00.001+02:00

For ein deilig, deilig sommar!

Ikkje sol og varme i store mengder, men litt inni mellom,

og dessutan så betyr ikkje det all verda i den store samanhengen!

Eg har fryda meg over dei fantastiske barna mine, hatt god tid saman med den fine mannen min,

storkosa meg med gode vennar og familie, ete god mat, sett på flotte, inspirerande, små og store ting,

reist med mange ulike framkomstmiddel, sove i mange ulike senger,

kjent på mange ulike følelsar...

Det er kjekt å vere tilbake!

La oss ta vare på kvarandre

og spre kjærleik, kjære vennar!

Lillebror er opptatt av dei små tinga.

Eg er opptatt av små ting, store tankar, fine ting, djupe tankar, enkle ting, korte tankar..

For eg kan velge litt. Vil eg vere djup eller overflatisk i dag, skal tru?

Ja, takk - begge deler! ;)

Tusen oppussingsprosjekt på gang i heimen, og altfor lite tid til handarbeid, rett og slett.

Neste veke skal eg tilbake til arbeidslivet, Storesøster blir skulejente,

og pappa og Lillebror skal nyte hausten saman heime.

Akkurat no ventar frukosten, familien og tekoppen.

Regnet fossar ned, og eg vurderer å begynne med interiørblogging...hihi!

Ha ein fortreffeleg dag!

Bryllaupsgåveidè

2011-07-05T11:41:00.000+02:00

I dag er ein slappfiskdag i denne heimen. Sommarforkjølelsen er verkeleg over oss og under oss og rundt oss og inni oss... Og medan Lillebror tar ein forhåpentlegvis laaang (dvs minst 45 minutt!) formiddagsdupp, ser Storesøster film om Den Lille Moldvarpen på tv. Herleg, nostalgisk lyd å ha i bakgrunnen!

Eg har tidligare skrive om Moldvarpen HER!

Ser du kva eg har bilder av denne gongen? Hihi...det er ein by eg ganske nettopp har vore i..

Dette er altså eit kunstverk, som eg har fått tak i hos Studio KMO på Etsy.

Då vi skulle i bryllaup i Paris hadde eg så lyst å gi brudeparet ei gåve som betydde mykje, utan at den nødvendigvis skulle vere veldig kostbar. Mannen var fotograf i bryllaupet, og eg syns vel eigentleg at det i seg sjølv er ei fin gåve.. Men vi ville jo gi noko anna også, og då dei fekk bildet i handa her ein kveld, viste det seg at det var ein suksess! Eg kjenner knapt nok paret, og visste rett og slett ikkje kva slags stil dei har. Mannen kunne av ein eller annan grunn heller ikkje utdjupe dette så godt for meg... Hæ? Så då vi kom over dette bildet meinte vi at det måtte jo bli bra. Det vil jo skifte uttrykk etter kva slags ramme du vil ha på det, og det vil vere eit minne om ein flott dag. Og eg tok meg til og med den friheita å feste på eit bittelite raudt hjarte der sjølve festen vart halden.. Romantisk og fint og ei super bryllaupsgåve!

Om du har sterke minner knytta til ein spesiell by, hadde det vel kjekt å ha eit slikt kunstverk på veggen frå den byen? Ta ein titt innom butikken og sjå kva du finn! Kanskje er din eller dykkar by der også? :)

No skal det bli kaffe og sjokoladebit på meg og mormor, og sikkert på Storesøster også.. ;)

Ha ein fin dag!

Mormorlukke og papirdukke

2011-07-04T19:29:00.000+02:00

Storesøster og mormor er bestevennar.

Slike bestevennar som alltid er lukkelege når dei møtast.

Som kosar og tullar og ler og syng og smilar og er så veldig, veldig glade i kvarandre.

Og heldigvis er mormor flink til å komme den lange vegen på besøk i ny og ne.

Slik at dei kan vere saman og ha det godt i lag. Slik som no. :)

Du ser vel at dette er ei lukkeleg jente?

Her sitt dei i den gamle turkise sofaen ute på verandaen.

Storesøster har funne fram ein kjole frå H&M som ho eeeelskar å danse i,

men som nesten ikkje er lov å bruke fordi eg er så redd for den...

Den var nemleg lillesøstra mi sin på 80-talet ein gong!

Fine søstra! Fine barnet! Fine kjolen!

Denne gongen hadde mormor som alltid med ei lita gåve då ho kom på besøk. Og den var suksess!

Du ser den på øverste bildet... Ei heilt skjønn papirdukke med mange ulike antrekk vart klipt ut og leika med.

Det beste var at den heiter det samme som mormor, og den hadde klede frå 50-talet då ho vaks opp...

Ei herleg stund for to bestevennar! Takk, mormor!

Håpar du nyt fine dagar med dei du er glad i!

Perler på ei snor

2011-07-01T12:16:00.000+02:00

Nye perler på handleddet i dag. Gule og fine. Faktisk enda finare på bildet enn på handa, for det er akkurat litt for mykje grønt i gulfargen. Nesten knallfin, men ikkje heilt.. ;) Men likevel, eg likar dei nye perlene mine, kjøpt for sånn omtrent elleve kroner og sekstiåtte øre hos Søstrene Grene. Og dei passar perfekt saman med den enda nyare og enda finare og ein del dyrare tunikaen i ein dus lysblå-grå-mint farge. :) Eg er klar for sommaren! Snakka forresten ein del om gult med ei venninne ein dag... Det finnast sterke meiningar om den fargen! ;) Kanskje gult er den neste fargen vi skal leite etter i husa våre, bloggarar?

Eg vart forresten ein smule overraska då eg pussa tennene mine i dag tidleg.. Vi hadde nemlig somla litt på morgonkvisten, og mannen med flexitid låg enno i senga medan eg var på badet med ungane. Ooops - eg skulle jo til tannlegen! Då var det berre å pusse ferdig og komme seg ut døra. Og heldigvis - tannlegen var fornøgd, og då er jo eg det også! :) No har eg akkurat hatt ein velfortent formiddagskaffe i sofakroken, og skal tilbake til arbeidsbordet på kjøkkenet. Store prosjekt på gang! :)

Ønskar deg ein deilig fredag!

Roser på Epla

2011-06-28T20:56:00.000+02:00

Nye varer i Eplabutikken min!

Denne gongen har eg lagt ut fargerike øyredobbar i ulike variantar,

i tillegg til at det er fylt på med fleire fine sanseputer.

Klikk på bildet for å komme til butikken!

Det er utruleg tilfredsstillande å pusle med småting!

Eg kosar meg med kreative syslar innimellom alt babystyret... For eg skal ikkje legge skjul på at det er eit styr med baby, altså! I dag er Lillebror 8 månader, og eg hadde verkeleg trudd at innan den tida skulle han sove godt både om natta og dagen, ligge på golvet eller i graset og bable og vere fornøgd...men ikkje denne guten, nei! Men heldigvis, han er frisk som ein fisk, og sjølv om han rasar og skrik nede på golvet, blir han glad og blid og utruleg sjarmerande når han får komme opp i armane. Vi tullar og ler og syng og herjar, og så lærer han vel å trivast på bakken etterkvart... ;) Snart stenger barnehagen, og fantastiske Storesøster kan leike og kose med han heile dagen...nesten. :) Eg gler meg, sjølv om det er trist og vemodig at ho ikkje skal vere barnehagejente lenger. Tenk, mi vesle jente skal begynne på skulen! Det er veldig, veldig rart, og både skummelt og spennande for både mor og barn, trur eg. ;)

No skal eg rydde saman krearotet mitt for kvelden, og så skal telefonen få gå varm.

Det er på tide med ein lang og god prat med ei veldig klok og god dame,

nemleg mamma mi, som har denne bloggen..

Ha ein flott kveld!

Tre rettar og godfølelse :)

2011-06-26T22:13:00.000+02:00

I går kveld feira eg og mannen oss sjølve. Treretters middag og pent pynta kjøkkenbord.

Champagne og tente lys. Romantikk. Luksus. Lukke.

Forrett:

Kamskjell i lardo (ein slags italiensk baconaktig sak frå deli'en..)

Tomatsalat med sjarlottlauk, pynta med frisk timian.

Hovudrett:

Saftig entrecote

Rotfruktmos (med søtpotet, sellerirot, gulrot og pepperrot)

Honningglaserte kantarellar og gulrotstrimlar

Nyyydeleg raudvinssaus

Blanda salat

Jada, det vart eit bilderas på bloggen i dag, og eg kunne vist enno fleire...

Kvelden vart godt dokumentert, og bilda skal hjelpe meg å halde minna langt framme.

Eg vil verkeleg anbefale ein slik kveld! Ein treng ikkje gå på restaurant for å feire.

Her i huset er det mannen som lagar biff, så det er eit triks å avtale at vi et det...

Og så står eg for rydding og pynting medan mannen kokkelerar i timesvis. ;)

Han handlar også inn både mat og drikke til slike kveldar, og det likar eg.

Desserten var ganske improvisert og av den superenkle varianten.

Mandelkjernepudding og raud saus. Poseting.. ;)

Men godt var det likevel! :)

Endeleg er sommaren tilbake her, og no når klokka rundar 22.00 har eg framleis sol på verandaen og inn i stova mi! Det er så fantastisk deilig med alt dette lyset!! Eg kjenner det djupt inn i hjartet,

og munnvikane trekkast automatisk oppover når eg tenker på det! :)

Håpar du har lyse og gode dagar

inni og utanpå!

Med sansane på vidt gap...

2011-06-25T10:44:00.000+02:00

Eg er inne i ein god stim om dagen. Eller heiter det steam? (Ja, for det er jo ingen andre som sym saman med meg, og det går jo nesten så det dampar her...) Hm. I alle fall - her går det så det susar! ;)

Sanseputer i fleng har blitt til ved sybordet og i sofakroken (!) og dei som ikkje allerede er solgt ligg ute på Epla. Dei går som nybakt brød (eller varmt hvetebrød, om du vil) - og er så populære hos dei små!

Barn frå 5-6 mnd alder elskar å plukke og smake på alle lappane! Eg brukar stoff og band med ulike teksturar for å stimulere den taktile kjensla, kontrastar for å stimulere synet og eit lita, forsiktig bjelle for å stimulere hørselen. Nokre brukar den til leike andre til kos. Og kanskje finn du også ei du likar?

I løpet av dagen håpar eg å få fullført dei siste fem som ikkje er tatt bilder av enno, så då blir dei også lagt ut på butikken min. Der er det forresten enno salg på alle ringar og utvalde hårspenner. ;)

Det var forresten utruleg koseleg å få så mange kommentarar på gårsdagens innlegg! :)

Og eg har ikkje greidd å sleppe det heilt enno, for det er noko med såpass personlege innlegg... Eg blir liksom aldri heilt ferdig med dei. Får ikkje sagt alt eg eigentleg vil seie, og veit ikkje heilt om andre legg det samme i orda som det eg gjer. Men sidan responsen var god, tenker eg det var greit likevel. Og alle dei orda som mangla, dei seier eg direkte til mannen i staden... ;) De får ikkje riktig alle detaljane, nemleg. Hihi :)

I dag hadde eg tenkt at sola skulle skinne over Trondheim, slik at hagearbeid og leikehytteoppussing skulle vere ein leik. Det er liksom ikkje like gøy i regnvèr... :) Men no er det opphald, og som den evige optimisten eg er, satsar eg på at lyset eg ser langt der borte i sør skal fordrive dei grå skyene! Kom igjen! :)

Ha ein strålande laurdag!

Bryllaupsdag :)

2011-06-24T14:37:00.001+02:00

Kjære, gode mannen min,

Gratulerer med dagen!

Gler meg til fleire gode år med deg!

På denne dagen for fem år sidan

feira vi bryllaup med familie og gode venner.

Ein knallfin og høgtideleg dag å sjå tilbake på!

Noko av det beste er at så mykje blir sagt på ein slik dag,

slikt som ein ellers ikkje seier til kvarandre, men som er godt å høyre.

Ikkje berre mellom dei to som giftar seg, men også i gode ord frå andre vi er glade i.

Kanskje vi skal bli flinkare til å "halde fin tale" til kvarandre i kvardagen også?

Uansett - eg er lukkeleg gift med godaste mannen og beste pappaen!

Heldige meg! Her er det humor, latter, gråt, krangel og kos,

sinte stemmer, glad musikk, frekke ord, glimt i auget,

mjuke hender, sterke meiningar, like verdiar,

intelligens, varme, temperament og glede.

Dette bildet frå bryllaupet likar eg så godt!

Og sidan fem års bryllaupsdag også kallast trebryllaup

har eg lånt eit fint bilde herfrå også.. :)

Ønskar deg ein deilig dag!

Sommarfest!

2011-06-23T20:58:00.000+02:00

Knasande, deilig, raud paprika

saftig, teriyakimarinert kylling

stjerneforma, kald agurk

trillrund cherrytomat

mjuk, mild kvitost

søt, god ananas

= digg!

I dag har det vore sommarfest i barnehagen, og det var som alltid kjempekoseleg! Eg elskar den barnehagen! I hutrande 12 grader, overskya og litt kald vind, måtte vi pakke godt på oss før vi sette oss på det herlege vatteppet og kosa oss med både saltmat og søtmat. :) Eg syns dei gjer det på ein lur måte i denne barnehagen, akkurat dette med mat og sånn, meiner eg. Det er nemlig slik at alle gutteforeldra skulle ta med noko godt til kaffen, medan jenteforeldra skulle ta med anna mat. Og så blir alt sett fram på eit bord til alle si store glede! Gøy å smake på andre sine salatar og gode saker, og eg kosa meg verkeleg med å lage til maten også! :) Ser ikkje det godt ut, vel?

Eg sette alle godbitane pent på spyd, og festa dei i ein halv melon.

Det blir fest med det samme!! :) Hurra!

Den finfine duken er forresten voksduk av billigste sort frå Stoff og stil. Sommarleg, glad og fresh!

No skal eg redigere bilder av dei nye sanseputene mine. Har sydd mange av dei i det siste, og det er på tide å legge dei ut på Eplabutikken min, under kategorien Nytt! ;) Kanskje rekk eg det i løpet av dagen?

Har forresten vunne i eit blogglotteri no nyleg, og gler meg til premien kjem i posten!

Sjekk ut bloggen og butikken til Lin&Papir! :)

Ønskar deg ein flott kveld!

Eit kupp!

2011-06-20T20:09:00.000+02:00

No er det SOMMARSALG på Epla!

Besøk butikken min her!

Alle ringar er sett ned med 30%

og utvalde hårspenner er sett ned med 50%

Løp og kjøp! ;)

Eg har forresten også gjort eit kupp i dag... På ein liten runde for å gjere nokre små ærend måtte eg innom Stoff og stil for å handle nokre bjeller. Mykje bilar på parkeringsplassen og eit stort gult skilt utanfor butikken. Hurra - salget begynte i dag! Oioioi...for første gong fann eg superfine stoff på salget der! Eg gjekk rundt i butikken med handlevogn og barnevogn, og med Lillebror på armen, for han vart fort lei av å vere der. Litt av ditt og litt av datt, litt til meg sjølv, litt til andre, litt rosa, litt blått, litt tjukt og litt tynt... Eg må jo ha litt å velge mellom! - som om eg ikkje har noko frå før..! Så då vart det plutseleg sånn cirka 15 meter til med stoff i samlinga. Og eg har ikkje ein gong symaskin no! Sylysta er ekstrem, kreativiteten sprudlar, idèane er uendeleg mange, kveldane er lange og lyse og nesten alt ligg til rette for å få produsert både til liten og stor. Eg har til og med ein slags plan om å få lånt meg ei maskin i morgon, men vi får sjå... Det store, flotte sybordet vi hadde midlertidig plassert i stova har flytta ut i hagen, og har fått eit fint strøk maling i dag. Men vi har jo framleis kjøkkenbord! ;) På tide å putte skattane i vaskemaskina? Tørkevèret er jo upåklageleg i dag, med strålande sol og sterk vind! Kva brukar du dei lyse kveldane til?

Ønskar deg ei kreativ veke!

Kreativ med og til barn

2011-06-19T20:58:00.000+02:00

Først av alt: Tusen takk for at de er så flinke til å legge att kommentarar!

Blir så utruleg glad i hjartet av det! :) Takk!

Prøvar å besøke alle som har skrive nokre ord, men må innrømme at det ikkje er alltid eg rekk det.

Men om eg ikkje legg at helsing, så kan det godt hende eg ar vore innom likevel!

På denne måten kjem eg over nye, fine bloggar som eg ellers ville gått glipp av..

I dag vil eg vise fram ein fin liten ting som eg og Storesøster laga for nokre veker sidan.

Ho teikna mønsteret og valgte fargar, og eg klipte ut og sydde saman.

Alt vi har brukt er litt filt, fire bitar med band, nokre perler og litt brodertråd.

Ja, så putta vi litt vatt inni og festa nokre knappar til pynt på banda som heng ned.

Sidan gjekk vi på butikken og kjøpte hårspenner, som Storesøster med glede festa fast.

Og i morgon er det bursdagsselskap for bestevenninna, og det blir stas å gi bort denne!

Det er ein dings til å henge på for eksempel badet eller andre stader småjenter fiksar håret,

og på den kan du henge alle hårspennene som ellers har ein tendens til å vere både her og der

og overalt, bortsett frå akkurat der du treng dei.. ;) Eller..?

Idèen er i alle fall henta i denne supre boka!

I dag har vi kosa oss masse i hagen, og eit forfalle, gammalt, lite hus har funne vegen heim til oss...

Vi har litt av eit prosjekt framfor oss! Eg satsar på å få tatt nokre før-bilder snart, og så skal vi vel få litt meir orden på det i løpet av sommaren. Ganske snart håpar eg eigentleg, men vi kan nok vere litt treige.

Den gamle dukkestua har stått i ein hage litt borti vegen her, og har vore ubrukt i over tjue år!

Eg har trilla tur forbi den hagen så veldig mange gongar, og har hatt så lyst til å overta det huset!

Og veit du, ein dag var det ei dame ute i hagen der og arbeidde, og eg stansa for å snakke litt med henne...

Det førte til at eg faktisk fekk heile dukkestua! Gratis! :) Jippi!

Dei var berre glade for at nokon ville ha den, og det forstår eg godt!

No får dukkestua eit nytt liv, og hagen deira eit mindre forfalle uttrykk..

Eg er sååå glad!

Håpar du får ei god veke!

I huset bortenfor huset...

2011-06-17T20:37:00.000+02:00

I huset bortenfor huset bortenfor huset

til snekker Kvikk

i rommet innenfor rommet innenfor rommet

til hans butikk

bak skapet bakenfor skapet bakenfor skapet

til hans madam

der ligger faren til bestefaren til bestefarfarens

søndagskam.

Dette leikne diktet av Inger Hagerup passa til dagens bilder, synest eg. :)

Her er det Storesøster som har kosa seg ved symaskina, med tilgang på

mamma sine restebunkar og store lager av band. Ho har konsentrert seg,

haldt tunga rett i munnen og tenkt nøye ut korleis ho vil ha det.

Og eg har fått lov å bruke resultatet som applikasjon på ei veske! Hurra!

Ja, men den veska skal vi sjølvsagt ha på deling.. ;)

Ønskar deg ein deilig fredagskveld!

Ja til sydag! ;)

2011-06-15T20:19:00.000+02:00

Mandagens sydag med gode venninner var ein kjempesuksess!

Eg anbefalar deg verkeleg å gjere det samme!

Vi var seks damer med ulike kompetansar og syferdigheter, og rundt det store bordet kunne vi sy, skravle, hjelpe kvarandre, inspirere kvarandre, le saman, motivere kvarandre...men der var også rom for frustrasjon og sinneutbrudd over sysakene... ;) Eg er vel blant dei som har nokre utbrudd inn i mellom, og hadde eg kunne banne, så hadde det nok vanka nokre glosar... Men i staden knurrar og glefser eg litt, og det hjelp faktisk veldig. Ja, og ikkje minst hjelp det å ha gode venner rundt seg! Eg fekk til og med låne den splitters nye symaskina til ei som berre kunne vere med nokre få timar. Så glad eg vart!!

Mi symaskin har vore trufast og veldig grei sidan eg kjøpte den for kanskje 7 år sidan eller sånn,

men akkurat denne helga fann den ut at den skulle knele... Aaargh!! Såå irriterande!!

No er den levert til reparasjon, og eg håpar den snart kjem heim att! :)

Men hallo! tenker du kanskje no.. Kvifor har eg desse bilda til dette innlegget? Jo, fordi dette er så supre sydagcookies! Eg måtte jo ha med noko godt, og fann ut at dette verkeleg var dagen for knappekakene! Oppskrifta har eg funne i favorittbladet BoligLiv. Var ikkje dei fine og morsomme?!

Og sidan eg ikkje greier å ta gode bilder samtidig som eg er høg på sying (for eg var verkeleg litt høg denne dagen...heilt gira, på ein måte! Stemninga var jo nesten litt euforisk blant oss småbarnsmødrene som hadde ein heil dag berre for oss sjølve!), så vart knappane mine tatt bilder av i dag. Eg kosa meg med deilig kaffe og kjeks på formiddagen. Det er luksus! Knappemønsteret er laga rett etter at kjeksa er tatt ut av ovnen. Eg brukte undersida på eit glas til å trykke ned midten, og så brukte eg litt tjukke sugerør til knappehola.

Dette kan sikkert gjerast med ulike typar cookies, ikkje berre peanøttsmørvarianten...

Og så var det ein titt bak kulissane. Eller ei lita realitetsorientering frå heimen, som ein også kan kalle det.

Hihi, i framkant kan du sjå kaffekoppen og kjeksa dandert på eit fint stykke papir, men mens eg holdt på å knipse bilder av dei tinga skrudde Lillebror verkeleg på sjarmen... Han såg eit kamera og glisa og lo - han er berre superlett å ta bilder av. Ser rett i kamera med dei fine augene sine...sukk, eg er forelska!

Bilda frå sydagen vart sett saman i kollasj...rett og slett fordi det ikkje var nokre gode bilder, og eg vil jo vise litt av stemninga og produksjonen frå denne dagen. :) Og bilda er jo ganske like dei frå fjorårets sydag, som du kan sjå her. Det er til og med dei samme tre venninnene.. Og så var vi to til denne gongen. Kjempekjekt!!

Kamera var først utan batteri, og då eg fekk batteriet levert på døra var ikkje fotografen i meg heilt til stades. Men eg gjorde eit lite forsøk likevel! Forhåpentlegvis får vi varmare dagar snart, og Storesøster kan posere i hagen med dei nye plagga sine... Den litt for store buksa er i bruk, og blusen sparast til første og beste bursdagsselskap. Det er så stas at ho blir så glad for det eg lagar! :)

I år som i fjor vart det ferdige resultatet klistra opp på ein av barnehageveggane for å dokumenterast.

Og ja, vi var stolte og glade og fornøgde med oss sjølve!

Takk for ein deilig dag, skjønne venninner!

Og forresten: Takk for alle dei kjempefine tilbakemeldingane på strikkepinneetuiet!

Mottakaren var veldig fornøgd, og eg mottok min dose skryt. Deilig! :)

Og det blomstrete stoffet kan du få tak i her, om du skulle lure...

Ønskar deg ein fin kveld!

DIY superenkelt strikkepinneetui!

2011-06-13T10:00:00.001+02:00

I dag skal eg endeleg få gitt bort ei bursdagsgåve til ei god og skjønn venninne som hadde bursdag for leeenge sidan. Det er nesten litt flaut, men eg har liksom hatt ein plan om å gi henne eit strikkepinneetui, men av ein eller annan grunn har eg ikkje orka å begynne på akkurat det prosjektet. Det virka liksom litt stort, på ein måte... Men eg kan absolutt ikkje forstå det no! Tenk at det skulle vere så lett! Og så gøy! Og så vart det kjempefint også!! :) Kanskje du også har lyst å prøve? Den superenkle varianten? ;)

Først finn du to fine stoffstykker, ca. 50x60 cm... Ja, eg hugsa ikkje å ta mål, men trur dette skal passe. :)

På det eine stoffet stryk du på vlieselin, slik at det blir litt meir hald i det. Då blir ikkje etuiet slaskete, men held fint forma, og eg tenker også at det toler litt meir av spisse pinnar og slikt når det er litt stivare.

Legg stoffa rettside mot rettside og sy rundt. La det stå att ei opning på 6-7cm til å vrenge gjennom.

Dette holet syr du igjen etter at "posen" er vrengt. Så stryk du kantane for å få det pent.

Brett inn ein del av stoffet, slik at det er plass nok til å ha strikkepinnar i oppbretten, men samtidig nok stoff att ovanfor til å brette ned over toppen på strikkepinnane. Kanskje du kan brette inn om lag ein fjerdedel, slik at kanten blir midt på stoffet? Prøv deg fram. Så måler du opp dei små lommene, og teiknar ein strek. Eg laga dei første lommene 3 cm, så auka eg til 4 cm og dei siste til 5 cm...sånn omtrent. ;) Den aller siste lomma er ekstra stor, slik at der er plass til ulike ting. Merk av øverst og nederst og teikn ein rett strek i mellom (med for eksempel ein krittblyant, eller noko anna som ikkje viser så godt).

Sy ein saum frå brettekanten og til toppen på lomma.

Fest på eit kanteband i ein matchande farge. Eg plukka ut det oransje frå midten av blomstrane, og det vart fiint! Kanskje må noko av kanten syast med sikksakksting før du festar på kantebandet, så blir det litt flatare og lettare å få til. Kantebandet tar eg berre mellom fingrane og held på plass medan eg syr.

Her kan du sjå korleis lommene auka i storleik, og at ei saks kan passe i den største. Praktisk. :)

I enden har eg også festa på navnelappen min og ei silkesnor.

Snora kan du feste inn under kantebandet, eller feste pent etterpå. :)

Til slutt festa eg på tal for å merke lommene til ulike pinnenummer. Veit ikkje kor lenge dei vil sitte på, men tøft vart det i alle fall! ;) Ein kan også bruke ein merketusj og skrive på for hand,

eller kva med å brodere tala med korssting..?

Håpar mottakaren blir fornøgd! :)

I dag skal eg vere saman med fem gode venninner heile dagen! Heldige meg!

Vi har lånt ein barnehage, og skal rigge oss til med symaskiner og stoff og lekre band, sybøker, fargar, god mat, deilig te, inspirasjon, motivasjon og skaparglede. Så herleg det skal bli! :)

Eg har litt sydilla om dagen, og frydar meg over alt som blir til!

(Innlegget skreiv eg i går kveld, og det er berre juks at eg liksom legg det ut no..)

Ønskar deg ein strålande 2.pinsedag!

Latmannsliv...?

2011-06-10T22:10:00.000+02:00

For ein deilig fredagsettermiddag! Sola har gjort verandaen til ein supervarm plass å vere,

selskapet har vore kjempekoseleg og maten fortreffeleg!

Og no er fredagspizzaen fortært og favorittdetektimen ventar... :)

Dagens muffinsoppskrift fann eg hos Pickles,

og dei er rett og slett kalla Latmannsskolebrød. Så enkelt og så godt!!

Her er den servert i ein av favorittkoppane mine, som eg ønskar meg fleire av. Nydelege!

Den knallrosa melaminkoppen frå Søstrene Grene er populær hos Storesøster,

og den matchande servietten frå same staden er jo også sommarleg og frisk!

Sola kjem inn stovevindua til seint, seint på kvelden, og det er så lyst og godt her!

Lupinane plukka eg på dagens lille trilletur, og den lyseblå muggen frå Ikea passa perfekt.

Eg er ingen interiørbloggar, men kunne ikkje dy meg i kveld.

No skal kvelden nytast med kjekke mannen!

Ønskar deg ei fortreffeleg helg!

Herlege tresko!

2011-06-09T09:50:00.002+02:00

Er ikkje desse treskoa berre heilt skjønne!?

Eg såg dei inne hos Linda/Den gode feen, og fall pladask!

Så no har både eg og Storesøster nye tresko, kjøpt på Plantasjen.

Faktisk er det ikkje mange dagane sidan eg skulle ut ein liten tur,

men kunne ikkje finne nokon gode, fine sko til å trakke inn i for å gå ut i hagen...

Gullsandalar? Nei, dei er til strandbruk.... Rosa crocs?? Næhei, dei er så glorete at det er trist...

Raude tresko? Ja, det vil eg ha! - og eg hugsar med glede dei herlege raude lakktreskoa eg av og til lånte av ei veldig god venninne eg bodde saman med på Grünerløkka for leenge sidan... Åh, det var ei herleg tid!

Ja, men no har eg tresko som eg kan bruke

når eg skal hente posten, bære ut søpla, hente grasløk

eller andre små, viktige ærend. :)

Og det ER viktig å føle seg fin!

I hagen min har valmuane spreidd seg så fint langs husveggen, og dei er både vakre i knopp og vidunderlege i blomst! :) Eg leika meg som fotograf på morgonkvisten i går, og dette er resultatet. Ikkje veit eg korleis det er med deg, men eg greier ikkje motstå lysta til å stryke på desse fine knoppane!

Den varme, oransje fargen er nyydeleg, og kronblada er fjørlette og tynne som den finaste silke.

Som ein serviettblomst, berre så ufatteleg mykje finare!

For ei tid tilbake lova eg å vise Lillebror sitt 17.maiantrekk. Men faktisk tok vi ingen oppstilte bilder for å dokumentere antrekka. ;) Så då måtte eg plutseleg knipse nokre bilder då eg såg han hadde på både buksa, bodyen og lua ein dag. Det var berre den kvite skjorta og sølja som mangla, men dei brukar vi sjeldan til kvardags, altså. Sjølv om eg er glad i å pynte guten min litt! ;)

Dette bildet står ikkje heilt i stil med dei andre hagebilda i dag, men-men..

Lua er heimesydd, og kan brukast på begge sider. Eigentleg trur eg faktisk at eg likar den andre sida best. Den som er utan pynteband, og som har striper på sidene og dei blå gardinene på toppen... Stripene er forresten av samme stoff som buksa. Det er kjøpt på Stoff og stil, og eg likar det veldig godt! Mjukt og deilig, og så blir han så fin i den! Den passar til det meste han har, syns eg! :) - som for eksempel til bodyen frå Hollys i den lekre blå fargen. Samme farge som på augene hans....sukk! Han er så skjønn!

Biteringen er forresten ein fugl frå Little Alouette, og den er god å putte i munnen!

(Uff, bildet skulle ha gjennomsiktige hjørner..! Skal prøve på nytt etterpå...)

På det nye arbeids-/stovebordet ligg ulike syprosjekt som skal fiksast på i løpet av dagen.

Og sjølve bordet er også verdt eit blogginnlegg eller to..hihi! More to come...

Ha ein flott dag!

Og vinnaren er...

2011-06-06T20:53:00.000+02:00

Då er vinnaren trekt i lotteriet mitt, og resultatet er behørig fotografert

- i dunkelt regnvèrslys i kveldinga...

Den heldige som får setetrekk frå Sykkelpikene i posten,

er den koselege, kreative og strikkekyndige dama

Heidi Kristin - Strikkefanten

"Knallfint gi-bort! Skal sykle mye i sommer, så denne blir jeg med på :-)

Sykkelpikene har så mye tøft utstyr! 2 lodd til meg :-) "

Kor vart forresten sommaren av?

Vi fekk ein bitteliten smak av sommar i dag, og eg skunda meg inn og fekk kortare bukser på.

Men før vi rakk å leite fram grillen var regnvèret tilbake! Æsj!

Då er det berre å pleie forkjølelsen med deilig chilite i favorittkoppen...

Og så har eg klipt opp ting som skal syast i løpet av den nærmaste veka, har eg tenkt.

Så no har eg eit lite dilemma...sofakrok eller sybord? Hmmm...

Ønskar deg ein fortreffeleg mandagskveld!

Glimt frå Paris

2011-06-05T21:21:00.001+02:00

Eg er heime igjen etter kjempefine dagar i Paris og gode dagar på Sunnmøre. For ein luksus det er å dra på tur! Eg elskar verkeleg å vere på veg. Dra med meg bagasjen og dei eg er glad i, inn i ein bil, eit tog, ein t-bane eller eit fly. Vere på farten. Kikke på menneska rundt meg, smile til dei og fryde meg over smil i retur. Lurer på kor alle skal? Lurer på kor dei kjem frå? Lurer på korleis dei har det? Om eg har tid og ro syns eg det er moro å lage meg forklaringar på ulike ting. Sjølvsagt blandar eg inn fordommar i bøtter og spann, men også litt humor eller tragedie, kjærleik eller sinne... Joda, fantasien er i orden. :)

Vi hadde altså tre nydelege dagar med kultur, romantikk og opplevingar i sjølvaste Paris. Og ei av dei beste stundene for meg var faktisk ein tidleg morgon i stille gater. Kvelden før var vi i bryllup på fasjonable Ritz, men med baby på tur vart det ikkje store utskeielsane for meg. Det var difor heilt greit å komme seg ut av hotellrommet kl. 8 morgonen etter, trille tur med morgonsola i augene bort til ein cafè, og gå derfrå og inn på plassen framfor Louvre med ein kaffe i handa. Der var sanden heilt kvit, bygningane store og overveldande flotte og detaljane uendeleg mange. Kineserane stressa, uteliggarane gjorde morgonstellet, dei spreke var på joggetur og vannspreiarane vatna gras, blomster og trær. Eg sette meg på ein benk og kikka på alt, medan Lillebror tok ein liten morgondupp i vogna. Etter at vannspreiaren bak meg forveksla meg med ei anna busk, spratt eg raskt opp og rusla inn i parken. Der var det vakkert! :) Og snart kom også den kjekke mannen min ruslande, og vi kunne finne ein frukostcafè.

Eigentleg burde eg investere i eit kompaktkamera. Det er synd at kamerautstyret skal fylle ein heil sekk, vege utallige kilo og kreve meir kunnskap enn eg har erverva meg til dags dato. Løysinga på denne vesle morgonturen vart difor eit halvdårleg mobilkamera, som ved hjelp av Picnic har blitt til litt kule bilder.

Kanskje mannen har fleire fine bilder eg kan få, og på den måten vise meir av Paris i eit seinare innlegg..

Tusen takk i massevis for flotte tips! Eg må berre innrømme at tida gjekk frykteleg fort og strakk ikkje til til alt det eg hadde lyst å gjere. Men vi fekk sett masse likevel og kosa oss! Herleg! :)

Hugs forresten at eg trekker blogglotteriet mitt i morgon! :)

Eplefin!

2011-05-24T21:18:00.000+02:00

Tusen takk

for mange gode Paristips!

Gler meg masse til tur, og håpar tida der vil vere GOD!

No i kveld har eg lagt ut desse to knallfine epleklokkene på Eplabutikken min,

og om du kastar deg over dei i løpet av kvelden kan eg garantere at dei går i posten i morgon!

Dessutan leeeengtar eg etter å sy litt igjen, og har fleire prosjekt oppklipt allerede.

Men Lillebror vil ikkje sove verken om natta eller dagen for tida, så energinivået er litt labert..

Gler meg til å ladast opp den kommande veka, både her og der! Skal mykje kjekt! :)

Kryssar fingrane for at askeskyene blæs bort eller fell ned,

at sola skal kikke fram og humøret vere på topp!

Håpar du har det godt der du er!

Skulle ønske...og Paristips..

2011-05-23T14:54:00.000+02:00

Skulle ønske eg fekk meg til å strikke ein slik! Eg fall pladask for dette herleg sommarplagget,

og så snart eg får somla meg til det, skal eg bestille dette fiiine garnet og sette meg ned med strikkepinnane!

Bilda har eg fått låne av flinke MonsterMønster, som forresten vart kåra til Beste håndarbeidsblogg i Håndlaga 2011! Du finn innlegget om dette strikkeprosjektet og mønsterlenke her.

Om ikkje så lenge drar vi på bryllupsreise til Paris...hihi!

Ja, det er ikkje vårt bryllup, altså, for det er faktisk snart fem år sidan,

men det er nokon andre som giftar seg i Paris, og vi er så heldige å få komme! :)

Trur Lillebror hadde likt seg i ein slik sommarleg dress der. For det er vel sommar der no? :)

Er det forresten nokon som har tips

til kva vi bør gjere og sjå når vi er i Paris?

Mannen, eg og Lillebror skal bu rett ved Louvre, så dit skal vi sjølvsagt.

Men ellers har vi lite planar for den laurdagen og søndagen vi skal vere aleine.

Tar gjerne imot tips, og kanskje det beste tipset får ei belønning? ;)

Gler meg i alle fall MASSE til kultur, cafèliv og romantikk...

Håpar du har ein deilig mandag!

Knuffelbeesten!

2011-05-22T17:16:00.000+02:00

Eg trur eg har verdas snillaste og skjønnaste søster!

Her ein dag hadde ho funne denne boka på loppis, og dermed fekk eg og Storesøster pakke i posten.

Heldige oss! -og med eit koseleg, enkelt brev til, med nydeleg loppisglansbilde på. Takk!!

Utruleg mykje inspirasjon i eit lite hefte! Herlege kosedyr i mange ulike variantar, og både store og små.

Heftet er visst ein del av ein hobbyserie, og dette kom ut i 1977. Det er på nederlandsk, men det går bra.

I dag ville Storesøster så veldig gjerne sy, og vi fann ut at vi skulle prøve oss på noko enkelt frå denne boka.

Ja, faktisk har vi laga to ting i dag, men den andre får eg heller vise fram seinare...

Her kan du sjå den fin-fine fingerdukka vi laga i dag.

Den er av filt, og vi har brukt både lim og nål og tråd.

Det er eit samarbeidsprosjekt, altså! Kjempekoseleg! :)

Ønskar deg ein deilig søndagskveld og ei flott, ny veke!

Hugs å bli med på lotteriet mitt! ;)

Fantastisk babyseng!

2011-05-20T09:00:00.001+02:00

I dag blir det rein reklame på bloggen min... Men du må berre sjå dette! ;)

No skal vi altså selge denne superduperfantastiske babysenga, som vi har hatt hengande på soverommet og rundt om i andre soverom vi har overnatta i det siste halve året. Den er rett og slett heilt genial, både for mor, far og ikkje minst for babyen. Han har lagt så lunt og godt og deilig i den senga, og han har elska å bli gynga, både opp og ned og fram og tilbake, og gjerne i kjempefart...! Sovemedisin! ;)

Kjenner du til konseptet? Du kan sjå nærmare på Sovgunga/Mawok her!

Eller er du blant dei syglade, flinke mødrene/tantene? Kanskje du vil la deg inspirere av å sjå

kva herlege, flinke, danske Rappedikke har gjort? Hennar Sansevugge kan du sjå her.

Eg fann ein krok i taket på verandaen, og fekk i hui og hast knipsa dette bildet i regnvèret.

Men du ser kanskje korleis den er? Mmmmm...deilig!

No ligg den ute på Finn.no til 650 kroner. Eit kupp! ;)

Du kan finne annonsa her!

Heimestrikka ullbukser er også til salgs. Eg har vist dei i dette innlegget tidligare, og eg er framleis fornøgd med arbeidet, altså.. Når det gjeld tøybleiebruken er vi no back in business, etter nokre månader med fulle bleiedunkar og stadige turar til butikken etter fleire bleier... Kanskje blir det færre bleieskift no når det kjem anna mat i magen? Vi gir det i alle fall ein ny sjanse! :) Men akkurat desse bleiene og ullbuksene har han vokse ut av, og det er jo berre såvidt brukt! Håpar nokon andre vil ha dei! Tøybleiene er TotsBots Bamboozle str.1, og dei treng sperrelag. Så då passar jo desse saman som fot i hose, hånd i hanske eller tøybleie i lanolinullbukse..! Og prisen? To dagbukser og ei nattbukse i lanolinull str 1-4 mnd for 275 kr,

og fire tøybleier (trur vi berre prøvde to av dei, nypris ca 640 kr) selgast for 240 kr. :)

Det er deilig å vere i gang med blogginga igjen!

Og eg kikkar innom dykk, sjølv om eg er lite flink til å skrive helsing..

Ha ein fin dag!

Mine papiresker i avisa!

2011-05-19T10:00:00.001+02:00

Har du lært deg å brette slike fine esker av papir?

Her på bloggen min har oppskrifta lagt framme ei god stund, og eg kan med glede sjå

at mange finn vegen til det innlegget via ulike søkemotorar! Så kjekt det er å dele!! :)

Forrige veke ville Adresseavisa bruke bilda mine i sitt fredagsbilag Hjem, og eg er så stolt!

Tenk at nokon der har lagt merke til vesle meg, og at mine bilder og mi forklaring kunne brukast!

Ja, dei oversette den riktignok til bokmål, men det er greit... Er det vanskeleg med nynorsk?

Om du vil sjå resultatet i avisa, kan du finne e-utgåva HER!

Og om du vil sjå oppskrifta mi på bloggen, kan du sjå HER!

Ønskar deg ein fortreffeleg torsdag!

Dagen derpå...

2011-05-18T19:07:00.000+02:00

I dag er mammaen her i huset sliten. Håret heng slapt, gårsdagens sminke er gnidd litt utover, kleda er behagelege og ufikse... Men gårsdagen var ein suksess!! :) Som du ser på bildet glimta det til med litt sol innimellom skyene og regnbygene, og ungeflokken som var på 17.maifest her på ettermiddagen fekk springe litt i hagen. Huset kan bli litt i minste laget med ni vaksne og åtte barn som skal spise og leike og prate og feire 17.mai! For ein herleg dag det var! Her ser du glimt av det tradisjonelle potetløpet,

der alle barna deltar, og alle barna får premie! :)

Vi feirar alltid dagen med enkel, god frukost før vi tar på bunadane og finkleda. Flagget går til topps, sølvet kjem på, og vi pakkar oss i bilen for å dra til byen. Der vandrar vi eit godt stykke frå parkeringa og inn til sentrum, og frydar oss over å sjå så mange finkledde folk på bytur. Storesøster var i storslag og verkeleg stråla i går! Inn i mellom er det også nokre som smilar med fjesa sine, og særleg turistane.. Dei stoppar ofte opp for å ta bilder av den bunadskledde mannen min. Han er flott! :) I byen kikkar vi litt på barnetoget før vi går i Nidarosdomen. Høgtideleg og fint! Og så er vi på Vestfrontplassen med vennar etterpå, der vi spis is, drikk kaffe og ser på folket. Barna får kvar sitt eksemplar av dei overprisa, glorete gassballongane, og så får dei springe så lenge dei orkar, og denne dagen kan ein også spise så mange is ein har lyst på! :) Vi ser delar av borgertoget også, før vi bevegar oss heimover. Og der blir det fest og feiring, med masse god mat og fine folk! Når kvelden kjem er det opprydding og sofaen som gjeld... Ahh, det er både utruleg kjekt og utruleg slitsomt med slike dagar! I dag har både eg og Lillebror vore litt trøytte og sure.. Men det går over! ;)

Hugsar du kvifor vi feirer denne dagen?

For barna seier vi gjerne at det er Norge sin bursdag,

men om du vil vite litt meir skriv Wikipedia dette:

17. mai er Norges nasjonaldag. Denne dagen i 1814 underskrev og beseglet medlemmene av Riksforsamlingen på Eidsvoll landets grunnlov. Forsamlingen valgte deretter regenten, prins Christian Frederik, til Norges konge. Dette innledet en kort periode for Norge som uavhengig stat, før landet etter en kortvarig krig med Sverige måtte inngå våpenhvile gjennom Mossekonvensjonen. Denne avtalen innebar at Norge godtok en personalunion med Sverige, men beholdt Grunnloven med de endringer som unionsinngåelsen gjorde nødvendige. Det medførte blant annet at ordet «uafhængigt» i § 1 i den reviderte Grunnloven av 4. november 1814 ble erstattet med ordet «selvstændigt». Innenfor unionen beholdt Norge selvstendighet og separate statlige institusjoner, bortsett fra kongen og utenrikstjenesten. 17. mai er en offisiell flaggdag og offentlig høytidsdag med arbeidsfri i Norge. Barn og voksne har siden slutten av 1800-tallet feiret dagen mer enn det som er vanlig for mange andre lands nasjonaldagsmarkeringer, blant annet med barnetog.

Kan det vere at denne vekelange bloggtørka mi går over no?

Kjenner du deg att i at det kan vere vanskeleg å blogge av og til? Det er nesten som om ingenting er viktig nok, ingen bilder er bra nok og tida strekk heller ikkje til. Men eg har verkeleg lyst til å blogge, for det er jo så moro, og så det er vel som med mykje anna; det er berre å komme i gang, så går det nesten av seg sjølv!

Tuuusen takk til deg som skriv ein kommentar eller er innom sjølv om det er lite nytt her!

Du motiverer meg masse!

Blogglotteri!

2011-05-12T20:12:00.000+02:00

Eg er tilbake med brask og bram, etter ein aldri så liten bloggferie i sommarsola!

Den må vi berre nyte når vi kan, og eg kan tole nokre dagar

med gråvèr og regn igjen etter eit sånt energitilskot! :)

Har du forresten leita fram sykkelen igjen? Tatt vårpussen og gjort den blank og fin? Men manglar du det lille ekstra? ;) Eg kan glad og fornøgd fortelle at min sykkel har fått nytt, raudt, prikkete setetrekk, og det er så fint! OG eg har fått eit ekstra, berre for å gi det til ein av blogglesarane mine!! Kan det freiste? :)

Setetrekket kjem frå ein butikk med massevis av fine saker

både til sykkelen og syklisten, berre sjå her:

Sykkelpikene

Reglane for lotteriet er:

Eitt lodd for å legge att kommentar.

To lodd for kommentar og lenke hit frå bloggen din eller facebook.

Tre lodd for kommentar og lenke både hit og til Sykkelpikene.

Også du som er utan blogg er velkommen til å delta,

men då er det fint om du gjer det mulig for meg å nå deg om du skulle vinne. :)

Skriv i kommentaren kor mange lodd du deltar med,

og bruk bildet når du lagar lenke hit!

Trekning 6. juni!

Lukke til!

Om salat og GOD tid

2011-05-05T20:23:00.000+02:00

Vanlegvis når vi har henta Storesøster i barnehagen leikar ho først litt med Lillebror, før ho blir opptatt med sine eigne ting. Ho kan leike med småstein, små figurar, pinnar, perler, fargeblyantar, ja, nesten kva som helst. Og dei lever sine eigne liv. Ho har lange fortellingar som ho ikkje likar å bli avbroten i.

"Jammen, eg er ikkje ferdig å fortelle enda!" seier ho viss eg prøvar å bryte inn...

Fantastisk fantasi og leikeevner, seier mammaen. ;)

Men i dag låg mamma på golvet og berre såg på henne. Og Lillebror låg der også. Og vi hadde GOD tid. Ikkje berre mykje tid, men riktig god og fin tid. :) Utruleg deilig! Og då kunne ho ikkje bli opptatt med å lage forestilling for dukkene sine, men leika og kosa med mammaen sin.

Åh, så godt det er!

Men etterkvart måtte vi begynne på middagen, og ho fekk tilbod om å lage salaten.

"Skal eg hjelpe deg med å lage salat?" spør ho, "Nei," svarar eg, "du skal få lage salaten!"

"Ja, det kan eg!" Og eg hjalp ho i gong. Vi fann fram det ho ville ha, og ho var stort sett med på idèane mine.

Forundra over at ho fekk låne den store, skarpe kniven, stolt over at ho fekk halde på sjølv.

Eg vart jo opptatt med dei andre tinga, og hjalp ho berre når ho trengte det.

Vi fann fram fuglebollen frå PiP, og den var akkurat passe stor til ein salat til oss to store jentene. :)

Der var det agurk, tomat, sukkererter, issalat (endeleg har ho forstått at det er godt!) og mais.

Enkelt og godt. Og dressingen tok eg ved sidan av, for å vere litt grei.. ;)

Ho var stolt over å ha laga sin heilt eigen salat, og eg var glad. Ikkje berre glad for å få hjelp med middagen, men mest av alt glad for å gjere jenta mi stolt av seg sjølv. Og glad for at vi hadde så GOD tid i dag.

Håpar du får GOD tid i morgon!

PS. Snart kjem det eit blogglotteri på bloggen min, så følg med... ;)

Eg vann!

2011-05-04T21:02:00.000+02:00

Eg deltok i eit blogglotteri hos Inghild/Heilt Heimelaga for ei stund sidan, og no har eg fått premien eg vann!

Hurra! Desse legoposane er heilt geniale! All legoen ligg i ein pose som ein kan folde heilt ut på golvet når ein skal leike, og når ein skal rydde opp er det berre å dra i snora, så havnar all legoen i posen igjen! Supert!

Inghild syr slike posar og ulike andre ting på bestilling, og der er det kvalitet på tinga, altså!

Ta deg ein tur innom, så kanskje du finn noko du vil ha! :)

I kveld, som i går kveld, er det sofaen som lokkar meg mest. Så får sysakene segle sin eigen sjø. Dei reiser uansett ikkje langt... ;) Eg derimot skal komme meg tidleg i seng og reise langt inn i draumeland.

Det er slitsomme dagar heime i permisjon, sjølv om det mest av alt er rein luksustid! Men når "arbeidsdagen" startar tidleg og ikkje er over før i åttetida på kvelden, og det ikkje har vore meir enn to halvtimespauser, så blir ein sliten. Det er ikkje så ulikt mange andre jobbar, vågar eg å påstå... Ja, viss ein elskar jobben sin, så klart! Eg NYT tida med barna mine, men skulle gjerne hatt meir overskot til andre ting!

Innimellom treng eg imidlertid å minne meg sjølv på at den jobben eg gjer no er av uvurderleg verdi,

og at frøa eg plantar i barna mine skal bere blomst og er med på å forme dei som menneske.

Oi, dette er store tankar... ;) -men viktig å hugse på for ei sliten småbarnsmor!

Ta vare på stundene!

Så kjekt å sy lue!!

2011-05-03T13:17:00.001+02:00

Denne lua fekk eg endeleg sydd i går, og det var rett og slett DEILIG!

Tenk at det kan vere så utruleg tilfredsstillande å sy!

Eg hadde riktignok litt startproblem, som vanleg, med denne gongen kom eg over desse og fekk løfta fram symaskina. Startproblema er kanskje kjent for fleire? Det er jo så tiltak å leite fram og rydde vekk symaskin, stoffbitar, fleire små koffertar med ulikt utstyr, for eg treng jo nesten alltid eit eller anna i akkurat den kofferten eg ikkje tok fram.. Og så er eg litt redd for å mislukkast, for då blir eg så sur. Og så blir eg tilsvarande glad når det blir som eg har tenkt! Og gjett kva slags humør eg endte opp med i går kveld?

Jepp, blid og glad og stolt over det eg hadde fått til. Det skal ikkje så mykje til, nemleg...

Det første eg gjorde då vi kom opp på kjøkkenet i dag tidleg, det var å plassere Lillebror i stolen og få på han lua... Men trur du den passa? Neida, den er nok aaaltfor lita! Æsj, altså! Men det var jammen bra det var i dag eg fann det ut, og ikkje i går kveld. Då hadde eg jo gått glipp av den gleda..hihi! :)

I løpet av kvelden skal eg nok få fiksa på litt småtteri, og kanskje sydd ei ny, STOR lue til den store guten min. Så kan den vesle lua kanskje få seg ein tur til Epla? Kanskje er det nokon andre den passar betre til? Eg kjenner liksom ikkje så mange små gutar... Men den kan forsåvidt også brukast av ei jente, altså.

Den er sydd av ei småblomstrete gardin og "mjølkegutstriper" fra Stoff og stil. Resten av 17.mai antrekket er tenkt å passe til lua, og eg skal nok vise det fram etterkvart som det blir ferdig!

På eine sida har lua ulike band frå mitt mangfoldige sortiment, men den kan vrengast om ein vil ha ein litt meir nøytral variant. Det er også fint! :) Joda, eg kjenner at eg alt gler meg til å lage ei til! Dette var gøy! Litt småjusteringar av mønsteret (frå Sy till barnen 0-4 år/Gynther) så tenker eg vi er i boks! ;)

Lillebror ser litt skeptisk ut på dette bildet, men han var faktisk veldig fornøgd!

Og no har han sove i snart to timar, så då er eg veldig fornøgd også..!

Ha ein strålande ettermiddag!

Kom mai, du skjønne milde...

2011-05-02T20:07:00.002+02:00

Vi storkosar oss med våren i Trondheim!

Eg trur jo at det vèret vi har akkurat no, er slikt vèr vi skal ha i lange tider framover. Har rett og slett vanskar med å forestille meg at det plutseleg ein morgon kan vere kaldt og surt,grått og trist, støvlar og strømpebukser igjen... Men for å vere på den sikre sida tar eg likevel inn dei nysådde frøa mine om natta.

Det er faktisk nesten minusgrader då, altså! Men enn så lenge strålar sola varmt og godt!

Denne helga hadde vi veldig lite planar. Vi skulle berre pusle rundt huset, rydde i hagen, gå tur og kose oss.

Det gjorde vi verkeleg også! Men kanskje kjekkast av alt var likevel turen vi hadde til Rotvollfjæra saman med gode venner. Storesøster kunne såvidt sykle aleine før vi tok turen dit, men etterpå hadde ho verkeleg stålkontroll! Det var heilt genialt å drive sykkeltrening på grasplenen ovanfor fjøresteinane.

Flatt og fint å sykle på og heilt greit å ramle der. Ingen nye skrubbsår! :) Og ho var så stolt!

På bildet ser du gliset, men du går glipp av lyden - ho ler heile vegen!

Vi fekk også testa ut litt av utstyret til Lillebror i helga.

Han har nemleg TFK sin nyaste vognbagmodell, Multi X, som du kan sjå nærmare på her.

Vi er så langt veldig fornøgde! Eg ville ha TFK fordi den er lett å trille, har handbremse og går lett inn i bilen.

Ikkje superfornøgd med alt, men så stiller eg høge krav også... Yrkesskade etter å ha prøvd ut utallige vogner i barnehagejobben? Skulle hatt min eigen perfekte kombinasjon av fleire ulike..!

Uansett: det store minuset med denne vogna har jo etter mi meining vore det at barnet må ligge vendt bort frå deg frå den dagen du velger å kutte ut bagen. Dette kan jo vere ganske tidleg, og då mister ein den kontakta ein har med kvarandre ute på tur, og som eg syns er ubetaleleg! Men med denne nye bagen kan ein altså fikse og trikse litt.. Ryggen kan hevast, fotenden gjerast litt om, bagen vippast opp - og hokus, pokus, du har ei sittevogn vendt mot deg! Hurra! Lillebror er enno litt liten til å sitte der særleg lenge, men det er heller ikkje mykje jobb å trylle den tilbake til den lune, gode bagen som er så god å sove i. :)

I vogna si har Lillebror no også fått den utruleg fine posen han fekk til dåpen sin. Den heiter LilleSommer, og du kan sjå nærmare på den her. Vi er så utruleg fornøgde med den! Kjempedeilig stoff, ullfòr og lekker design! Litt stor enno, men det betyr vel berre at han kan bruke den leeenge! Tuusen takk, J!!

No skal det syast her!

Eg har funne ut at Lillebror må ha nye penklær til 17.mai, og det skal eg greie å fikse!

Har forresten lagt ut nye stoff til salgs i Eplabutikken min! :)

Ha ein deilig kveld!

Glad blomsterjord...

2011-04-29T11:01:00.000+02:00

Deilig formiddagstur i dag vart avslutta med nydeleg latte på trappa.

Der såg eg denne finfine posen med blomsterjord.

Tenk om all emballasje kunne vere så fin! :)

Dessutan passa den perfekt i fargen til

mine favorittsko frå Kawasaki.

Eg lurer på om bilda er like fine i innelys som her ute i sola...

Koseleg - men ikkje heilt enkelt - å lage blogginnlegg ute

med ein etterkvart utolmodig Lillebror på fanget.. ;)

Ha ein god dag!

Nye hårspenner

2011-04-28T13:23:00.000+02:00

Eg har jo kosa meg med litt småpusling også i påska, og då vart desse spennene laga.

Du finn dei i Eplabutikken min HER!

Og om du berre vil sjå det som er nytt, må du klikke på den kategorien på venstresida.

Det er jammen gøy å drive butikk, men det er også mykje arbeid som ligg bak!

Ikkje berre skal eg lage det eg skal selge, men det skal også fotograferast, redigerast og leggast ut i butikken. Dette tar jo nesten like lang tid som sjølve den kreative prosessen, og er langt ifra like morsomt..

Men no er det mange som har butikk på Epla, og du kan finne sååå mykje fint!

Ja, og ganske mykje som ikkje er særleg fint heller... ;)

Har du eit talent og tid til overs, så kan du også opne butikk! :)

Likar du forresten den vårlege overskrifta mi?

Tenkte det passa å bytte ut dei mjuke, gode ullkulene med frisk og fin kvitveis!

Bringer tankane til solrike dagar, blå himmel og 17. mai... ;)

Ha ein strålande dag!

Påskeglimt

2011-04-27T21:04:00.000+02:00

Eg må jo berre komme med nokre bilder for å vise fram litt av mi påske, slik som så mange andre gjer.

Det blir tatt bilder litt i rykk og napp når eg er på tur. Enten har eg kamera framme og tar mange bilder,

eller så ligg det godt pakka ned, og blir ikkje leita fram. Omtrent som pc-bruken, altså... ;)

Og så syns eg dette innlegget hos bareWunderbar sette så fint ord på det.

Måske er det fraværet, der giver mig nærvær andre steder...

Vi har vore på påskeeggjakt i skogen saman med nokre av fetterane.

Det er stor stas å vere på garden til bestemor og bestefar!

-og eg skulle jo tatt bilde av dei bittesmå lamma og geitekillingane!

Og vi har også vore ved havet.

Det store, store, utruleg fascinerande havet.

Eg ELSKAR lyset der ute i havgapet.

Og den fredelege lyden av hav.

Og lufta som er så frisk!

Storesøster storkosa seg på stranda i den nye, herlege regndressen sin.

Og Lillebror fekk sine første raude roser i kinna, der han hang og kosa seg i bæresjalet på magen min.

Det var forresten nesten umulig å ta bilde av Storesøster, for ho var heilt i hundre heile tida, og ikkje særleg interessert i å bli tatt bilder av. Men eg syns det er greit. Det er jo jammen ikkje så ofte at vi har mormor i nærleiken og ei strand rett utanfor døra! Ja, for mormor leigde ei lita hytta nokre dagar, slik at vi kom oss ut i havgapet og hadde masse tid der. Eg blir nesten freista til å sette opp eit hus der ute ved havet, eg!

Lillebror nærmar seg 6 månader no. Og tida går så usannsynleg fort!

Sjå kor stor og skjønn han er! (-og alltid lett å ta fine bilder av!)

Håpar du også har hatt gode dagar!

Åh, så vakkert!!

2011-04-26T23:06:00.000+02:00

Foto: Henrik Bengtsson

Dette er Gine.

Lisjesystra mi.

Og eg er så utruleg stolt!

No kan DU stemme på henne ved å følge denne lenka HER!

Ho fortener nemleg å vinne Musikkprisen 2011,

med sin eigenkomponerte song

Lingering Lover.

Klikk på hjartesymbolet for å avgi di stemme!

Om du vil høyre meir, kan du finne heimesida hennar her.

Vi har forresten hatt ei kjempefin påske,

men no er ferien over og kvardagsblogginga tar til igjen. ;)

Det er kjekt å vere tilbake i bloggverda!

Og vinnaren er...

2011-04-15T17:31:00.000+02:00

Vinnarane av blogglotteriet mitt er no trekt ut!

Det vart nesten 80 lodd, og alle lodda vart lagt opp i denne skjønne skåla som systra mi har laga.

Den er såå fin! Og bordet den står på er heilt nydeleg, rett og slett. Det er eit familieklenodium,

og som de kanskje forstår er eg og barna på påskeferie... Vi kosar oss!!

Lillebror trekte ut den heldige vinnaren, og eg kunne ikkje dy meg og måtte ta med ein trøstegevinst også.

Det var jo så kjekt at så mange ville bli med, og så var det så stas å få så masse god respons på

Eplabutikken min! Håpar de kjem tilbake dit! ;)

Hege/Hegemoni får dei rosa Dollyøyredobbane ho ønska seg,

og IdèSpiren får velge ut eit sett hårspenner til minispiren! ;)

Gratulerer!

Og så vil eg gratulere vinnarane av Handlaga 2011!

Eg vart ikkje blant dei, men eg syns jammen det var kjempestas å få komme til finalen, eg!

Takk til dei som stemte på meg! :)

Ønskar deg og dine ein skjønn fredagskveld!

Knasande gode knekkebrød!

2011-04-13T11:39:00.000+02:00

Eg har fullstendig dilla på desse lekre knekkebrøda!

Dei er superenkle å lage, og eg bakte faktisk forrige ladning mens eg steikte pannekaker ein dag!

Men dei forsvinn nesten like fort som dei kjem på benken, så eg rekk liksom ikkje å pakke dei ordentleg vekk, før eg må lage ny porsjon, så neste gong skal eg doble oppskrifta..minst!

Oppskrifta fann eg i ei utgåve av BoligLiv tidligare i år, eit blad som forresten er heilt fullt av store mengder nyttig inspirasjon og idèar, både når det gjeld mat, interiør, hage og hobby... Verkeleg eit favorittblad!!

Dessutan har eg funne ein skjønn, liten blogg som kom med ei freistande knekkebrødoppskrift til meg! Så no må mannen berre begynne å dyrke surdeig igjen.. ;) Ta ein titt inn hit!

Knasande gode knekkebrød

à la BoligLiv

30 g havregryn
30 g solsikkefrø
30 g graskarkjerner
40 g sesamfrø
50 g linfrø
100 g kveitemjøl
1/2 ts bakepulver
1 ts salt
1 dl vatn
1/2 dl olje

Bland det tørre før du blandar i vatn og olje. Deigen skal vere klissete.

Legg deigen på eit bakepapir, og legg også bakepapir over.

Kjevle den ut så den passar på ei bakeplate,

flytt den over og fjern det øverste papiret.

Steikast på 200 grader i ca. 15 minutt.

Avkjølast på rist og oppbevarast best i papirpose.

Kos deg!

- og hugs blogglotteriet som trekkast på fredag!

Sikksakk-godis!

2011-04-10T20:49:00.000+02:00

Sjå kor utruleg lekkert!!

Eg NYT synet av dei nye sikksakkbanda mine,

og har bestemt meg for å dele på godene...

Likar du nokre av desse fargekombinasjonane, kanskje?

Denne gongen har eg lagt saman tre ulike fargar à to meter i kvar pakke,

og du kan kjøpe dei her!

Dette er sikksakkbanda eg brukte i puta du ser i innlegget under dette,

og dei er i stor storleik, altså! Sjølve bandet er 10 mm breidt, og det er så flott!

Gler meg til å bruke det på både fleire puter, babytepper, posar, skjørt..osv!

Hiv deg med på sikksakkbølga, du også! ;)

(Pling - der fekk eg vel ordspelpoeng..? Hihi..)

Forutan Eplajobbing, babykos og klesvask har denne søndagen inneholdt

late timar rundt huset, og deilige, vårlege aktivitetar.

Dette er vel sikre vårteikn?

-og som du kan sjå på bildet, har ikkje sola smelta all snøen heilt enno..

Men det blir stadig meir plen her, og det er nok ikkje lenge igjen til eg kan begynne å plukke på beda mine no! I år skal eg få til så mykje fint! :) ...håpar eg, altså!

No inntar eg sofakroken ganske snart.

Då blir det te, pledd og tente lys,

og du skal ikkje sjå bort i frå at eg sovnar...

Ha ein skjønn kveld!

Puteglede!

2011-04-08T13:41:00.000+02:00

Det er fascinerande kor mykje tilfredsstillelse ein kan få av å sy noko ein blir fornøgd med!

Denne puta satt eg og streva med i går kveld, og eg er så utruleg fornøgd med resultatet!

Ja, eg kunne nesten tenke meg å ha den i sofaen, men mannen syns den var litt for fargerik...

- eg trur han meinte barnsleg...hihi! Men vi har jo nokre barnehjørne i stova vår også,

så eg skal nok få kikka på den litt innimellom uansett! :)

På dette bildet prydar puta vogga som morfar har laga, og der LilleSommer også ligg og ventar på varmare dagar og deilige trilleturar. I dag har eg nesten haustfornemmelsar, med fyr i peisen, vinden susande rundt huset og kaldt regn som slår mot vindua... Snøen er heller ikkje borte frå hagen enno, men dette ruskeveret kan kanskje hjelpe på det? Uansett, det eg skulle fram til var at det var faktisk ganske mørkt i stova mi i dag. Det blir liksom ikkje heilt lyst når det er sånt pyton vèr! I tillegg har Lillebror bestemt at dette er den store skrikedagen, og eg har absolutt ikkje lyst ut på trilletur.. Nei, då får han heller sovne til puppen! Og så kan eg sitte og glo på alle dei fine sikksakkbanda, stoffa og tinga som ligg framme...og planlegge og drøyme om alt eg vil lage! No er eg igang, altså! ;)

Litt om puta: Den har konvoluttopning bak, og både det gule og det blå stoffet er frå Stoff og stil. Eg har berre små restar att av det blå no, som er ein favoritt som ikkje produserast meir. I fjor var Lille så snill at ho sendte meg nokre meter frå Kristiansand. Det er eg jammen glad for enno!! :) Bildet på puta er klipt frå eit stoff eg fekk av systra mi i bursdagsgåve. Det er såå fint! Verkeleg til å bli glad av! :) Eg har berre ein liten bit, så det skal jammen brukast med omhu. Og planane er som vanleg mange. ;) Ser du forresten den fine kanten rundt puta? Det er sikksakkband i ein variant du snart kan finne på Epla. Må berre ordne litt først.. ;)

Men enn så lenge fins det 16 ulike fargar i ein smalare (5 mm) variant i butikken min, altså!

Hugs å bli med i blogglotteriet, da!

Sykkelpikene!

2011-04-05T22:21:00.001+02:00

Eg har lyst å finne fram sykkelen og prise våren!

Nei, ikkje den grå offroadsykkelen som står i garasjen...men kanskje ein påskegul?

Eller kva med ein lysblå? Og sjølvsagt med korg på styret, blomst i håret og flagrande kjole...

Sykkelpikene

er butikken eg nettopp har falle pladask for...

Syklar og hjelmar og utstyr i utruleg mange fine variantar!!

Klikk på navnet for å komme til butikken!

Eg vil ut på sykkeltur i solskinn med det samme!

Og så har eg sjølvsagt tenkt at Storesøster verkeleg skal lære å sykle denne våren,

og ho hadde nok eeelska mykje av ekstrautstyret ein kan finne til barn!

...og tenk om mannen kunne sykle med fine klede, kul veske og herleg hjelm som dette!

Då ville han jammen vore kjekk!! -eh, han er jo ikkje så verst i tights og gul sykkeljakke heller,

men eg ville nok foretrekke meir den stilen som er på bildet... ;) Sorry, B!

Alle bilda er lånt av Sykkelpikene.

I dag har eg møtt to herlege damer på cafè! Moro med nye bloggbekjentskaper! :)

Og ekstra moro når desse to kan inspirere meg til å sy heilt utan at vi snakka om det!

I kveld var eg fast bestemt på å sy nokre putetrekk igjen, men uff og uff..eg fekk ikkje gjort det.

Kjenner at senga freistar meir enn symaskina no, og då blir resultatet aldri noko særleg bra om eg velger å bli sittande... Kanskje i morgon? Skal jo trass alt treffe ei anna herleg bloggvenninne då! :)

Ønskar deg ei god natt!

DIY smekke

2011-04-04T10:23:00.001+02:00

Det er så mange eg snakkar med som seier at dei ikkje kan å sy.

Det trur eg ikkje så veldig på.. Eg trur at dei aller fleste som prøvar seg på eit enkelt prosjekt

vil få det til. Det handlar berre om å finne det riktige prosjektet. Så her kjem ei enkel oppskrift på korleis du kan få kjenne på den gode kjensla av meistring og samtidig laga noko brukandes...

Finn ei smekke du likar. Eg har funne fram ei frå Blafre.

Denne legg du på to lag med stoff, ei framside og ei bakside.

Her har eg brukt frottè på baksida, for å kunne halde på ein del væske,

og mjukt og godt sengetøy som framside.

Teikn rundt smekka.

Du kan bruke spesialblyantar...

-eller ein vanleg penn...

Men ikkje klipp ut enno!

Sy ein sikksakksaum sånn cirka på streken,

og klipp så nærme saumen du kan utan å klippe av tråden.

Det kan nok vere lurt å feste stoffa saman med knappenåler først,

og kanskje klippe litt grovt rundt, slik at stykket du held på med blir litt mindre.

La barnet få vere med på leiken...

Finn eit skråband i passande farge,

og sy det fast langs kanten.

Fest eventuelt på noko pynt,

som dette strykemerket frå Happy Bella.

Fest på eit par trykknappar eller litt borrelås.

Eg likar faktisk best det siste. Enkelt å feste og så lettvint i bruk!

Test ut det ferdige resultatet...

Denne vart i alle fall godkjent! ;)

Lukke til!

Vår og sol og herlege fargar...

2011-04-03T21:41:00.000+02:00

For ein solstråle!

Eg seier berre: Sol ute, sol inne...

Sol i hjartet, sol i sinnet,

SOL - berre sol!

Denne søndagen har vore så utruleg deilig, med 15 grader og strålande sol.

Snøen forsvinn i rasande fart - heldigvis! - og eg har fått farge i kinna i dag!

På bildet ser du Lillebror liggande inne på det nye vatteppet mitt, som også gir solskinn til stova.

Det var eit bruktfunn eg gjorde i ein kyrkjekjellar i Asker forrige helg,

(Vardeåsen kirke har stort bruktmarked kvar tirsdag ettermiddag!)

og som eg greidde å stappe ned i sekken min for å ta med på toget heim til Trondheim.

Blir så glad av å sjå på det! Og sjølvsagt også av å sjå på den skjønne guten..!

Veldig kjekt med god respons på blogglotteriet!

Men no må eg også få reklamere litt for nye varer i Eplabutikken,

nemleg metervis med sikksakkband i 16 ulike fargar.

Det er vel meir enn dei har på Stoff og stil...! ;)

Løp og kjøp!

Ønskar deg ei vårleg veke!

Blogglotteri

2011-04-01T12:13:00.000+02:00

Eg har så lyst å feire!

Det er mange gode grunnar til feiring, og eg tenkte nesten å ramse opp nokre, men syns det vart for vanskeleg å begrense meg... I staden seier eg berre TAKK!

Premien i dette lotteriet er ei vare etter eige val i Eplabutikken min, som du finn her!

Denne gongen stiller eg to krav for å vere med i trekninga:

Legg att ein kommentar der du skriv kva du ønskar deg frå butikken,

og skriv kvifor du likar akkurat denne tingen!

For eit ekstra lodd legg du inn dette bildet og ei lenke hit frå bloggen din eller facebook.

Også dei utan blogg kan delta, men hugs å legge att e-postadressa di, så eg kan nå deg om du vinn!

Trekning blir fredag 15.april!

Takk for at du er med!

Og dei nominerte er........

2011-03-31T10:23:00.000+02:00

Oioioi - så utruleg moro!!

Du har vel fått med det flotte initiativet Handlaga 2011?

No har dommarane valgt ut finalistane og eg er med!

Må seie at det er ei skikkeleg vitamininnsprøytning for tiltakslysta og kreativiteten,

og håpar eg får gjort litt meir framover enn eg har gjort i det siste... Vil begynne med det samme!

Syns tida går så fort, og les om alle som storkosar seg med prosjekta sine på kveldstid,

men kva gjer eg...? Joda, eg sitt ved pc'en eller tv'en og glor, med ein kopp te og eit teppe,

og gler meg til å komme i seng, for eg er så trøytt... På tide å nattamme litt sjeldnare snart?

Eller kva med å foreslå at Lillebror søv lengre enn 30 minutt om dagen snart?

Det finnast ulike kategoriar i denne konkurransen, og etter ein nominasjonsrunde har dommarar plukka ut ti finalistar i kvar kategori. Så skal stemmene delast ut, og du kan kun stemme ein gong i kvar kategori.

Bruk stemmeretten din innan 12. april! :)

I kategorien for Smykker finn du ringen min, og kan stemme på den her!

I kategorien for Barn finn du sanseputa mi, og kan stemme på den her!

Begge deler og meire til kan du finne i Eplabutikken min her!

Kos deg!

Tilbake til snøen..

2011-03-30T12:35:00.000+02:00

Eg har vore på tur i helga, nesten heilt aleine, og det har vore såå kjekt!

Det var altså berre meg og Lillebror, for han må jo vere der puppen er, med vogn og ryggsekk på togtur til Oslo. Så deeeilig! Der var det jammen skikkeleg vår! Eg hadde heldigvis lagt att Sorelstøvlane heime og pakka tøysko i bagasjen, og kunne vandre rundt i kjente trakter på Grünerløkka på tørr asfalt.

Det vart cafèmarathon og Sprellbesøk med skjønne M på fredagen, deilig lunsj med gamle kjente på laurdagen og litt andre venninner innimellom. Så godt å ha to heile dagar og ikkje berre to timar i byen!

Søndagen var eg fadder i barnedåp, og det var eit nyyydeleg dåpsbarn og ei fin feiring!

Og det er jammen litt av ei ære å få vere fadder! :) Takk BO!

Desse herlege keramikkmagnetane av Tiril Havdal kjøpte eg på designmarkedet Sukker før eg reiste.

Det er så koseleg å ha med ei lita gåve til vertinna! Ho var så snill at ho lånte ut det vesle soverommet sitt til meg og Lillebror, og låg sjølv på sofaen i stova i fire netter... Slik er det med ein liten toroms sentralt i byen. Men vi storkosa oss! Dessutan var dette eit besøk som var enklast når vi ikkje kom fire på ein gong! Hihi..

Og heime i Trondheim var det ei Storesøster og ein pappa som sakna oss, og det syns eg også var heilt greit!

Eg trur jammen det er sunt for alle at vi saknar kvarandre innimellom! Og så godt det er å sjåast igjen! :)

Vel heime er det full vinter og snø i store mengder! Eller...vi merkar jo at det er vår!

Himmelen er blå, sola varmar og snøen smeltar... Tid for frappe, kanskje? ;)

Ha ein herleg dag!

Grandtantekos

2011-03-22T19:44:00.000+01:00

Eit klassisk motiv. Den 90 år gamle, fine, mjuke handa, og den lubne, gode handa til ein baby.

Men for meg er ikkje dette berre eit fint motiv, det er noko som betyr noko. For meg.

Dette er handa til grandtante Hildur, som vi ser altfor sjeldan, og som nesten ikkje ser oss lenger.

Og så er det handa til Lillebror, som grip tak i det han når og held i det med eit fast grep.

Ho som har eit langt og spennande liv bak seg, og han som har det framfor seg.

Vi veit ikkje kva som ventar, og eg kjenner at eg gjerne skulle visst meir om det som har vore.

Grandtante Hildur kan fortelle om kva ho gjorde den dagen krigen kom til Ålesund og Norge, ho kan fortelle om eit slit for å leve og om ei spennande tid som student på musikkonservatoriet i Oslo. Ho er har faktisk utdanning som klassisk songarinne, men har jobba i butikk store delar av livet. Men songen og gleda over musikken har ho alltid med seg, og det er heilt fantastisk å høyre den skjelvande, skjønne stemma synge! Musikkgleda har fleire i familien arva, og vi prøvar alltid å få Storesøster til å halde ein liten konsert når vi treff Hildur. Eg syns vi er heldige. Det er ein rikdom å ha familie og historiefortellarar rundt seg!

Eg gler meg til påske! Då skal vi treffe familien igjen! :)

Tankefull helsing frå meg i dag. Berre fordi eg kom over dette fine bildet.

Og som de veit; eit bilde seier meir enn tusen ord!

Ha ein fin kveld!

Stoff til salgs

2011-03-21T15:27:00.000+01:00

Eg har lagt ut nokre stoffbitar på butikken min på morsomme Epla Materiell! :)

Men det er verkeleg vanskeleg med prissetting! Har lest litt kva andre meiner om dette,

og har samanlikna med andre stadar ein handlar slikt... Trur du eg greier å treffe?

Om du kikkar innom butikken blir eg glad for tilbakemeldingar!

I dag høljeregnar det i Trondheim, og eg er eigentleg glad for det...

Kanskje snøen snart kan bli borte, då? :) Kosar meg inne med dei skjønne barna mine no,

og siklar litt over dei nyaste stoffkjøpa mine. Kanskje eg må sy noko av dei snart? Og vise fram?

Forresten - tuuusen takk for mange koselege kommentarar på innlegget mitt i går! Eg blir så umåteleg glad for dei! Ikkje alltid eg rekk å svare alle, men eg prøvar å kikke innom kvar og ein! :)

Ønskar deg og dine ein god mandag!

Dinglande uro og Rie Elise Larsen

2011-03-20T20:56:00.000+01:00

Lillebror treng meir underhaldning for å halde humøret oppe under påkledning, og eg har difor laga ei uro som skal få henge over stellebordet. Eg har ikkje vore superkreativ akkurat, for liknande skyer og regndropar har eg jo sett flust av rundt omkring på bloggane, men ikkje ein slik variant...

Hos Fargevandring blir eg alltid inspirert, og ho har jo også ein slags skyuro øverst i bloggen sin.

Og dessutan har ho så mange lekre bilder, så den bloggen er vel verdt eit besøk! :)

Min uro er altså ikkje sydd, men laga av papir. Og fordi Lillebror skal ligge under og kikke opp, så har eg laga dråpane litt spesielle, noko som også gjer at dei snurrar så fint når ein blæs på dei. Mesteparten av papiret er laga av den dyktige dama Rie Elise Larsen, men noko er også kjøpt hos Søstrene Grene.

Eg kjenner at eg berre MÅ vise litt fleire av Rie Elise Larsen sine ting,

og har lånt bilder på heimesida hennar.

Dette er verkeleg INSPIRASJON:

Blir jo litt flau over mitt eige dårlege urobilde no... Burde sjølvsagt ha fiksa meir på både omgivelsane og fargane i bildet, men det har eg altså ikkje gjort! Og no er det nesten natt, så nye bilder blir ikkje tatt i kveld, i alle fall. ;) I kveld blir det Livvaktene på tv, tente lys og sofakos.. Og alle verdas katastrofer får ikkje sleppe inn så veldig i kveld. Kjenner det blir både nok og for mykje av tragediar på ein gong no..

Ønskar deg ein deilig søndagskveld!

Stille for Japan

2011-03-18T10:59:00.000+01:00

I dag er det stille dag for Japan blant mange bloggarar.

Eg er ikkje heilt stille, men det betyr ikkje at eg ikkje tenker på katastofen der.

For det er jammen ei katastrofe av enno uante dimensjonar,

med så veldig mange hendingar som vi enno ikkje kjenner summen av.

La oss vere stille for Japan,

be ei bøn, tenne eit lys, gi ei gåve,

eller kva enn DU vil gjere

for dei som er ramma!

Siste sjanse...

2011-03-16T22:21:00.001+01:00

No har eg gått gjennom alle kategoriane i Håndlaga 2011,

og har nominert fine ting og flotte folk i aust og vest. Bli med du også!

På bloggen sin skriv dei dette:

Strikker du votter? Syr du dine egne klær? Snekrer du leketøy?
Bli med på årets store begivenhet og vinn flotte premier!
Vi arrangerer Håndlaga 2011; en mønstring for skapende sjeler over hele landet!

I Norge er det utallige dyktige mennesker som lager, former og skaper til seg selv og til andre. Inntoget av sosiale medier de siste årene har gitt oss helt nye møteplasser; blogging, fotoutveksling og markedsplasser for håndlaget har stimulert og gitt næring til et stort virtuelt fellesskap av kreative mennesker.

Vi ønsker å rette søkelyset mot den store bredden av håndlagede ting i Norge, vise fram håndarbeid av høy kvalitet og feire fellesskapet som får fram slike gjenstander. Derfor utlyser vi denne konkurransen, et norsk mesterskap i håndlaget!
Konkurransen finner sted på handlaga.no. Det vil være åtte kategorier som vi håper skal klare å fange opp bredden innen dette feltet. Alle kan nominere til konkurransen og man kan nominere to gjenstander til hver kategori; en selvlaget og en laget av noen andre. Alle gjenstandene må være publisert på nett, f.eks. i en blogg, på Epla eller annet nettsted.
Nominering foregår i perioden 28. februar til 18. mars. Når denne runden er over vil et dommerpanel vurdere alle nominasjonene og plukke ut ti finalister i hver kategori. Disse blir kunngjort her i bloggen 30. mars, og da åpner vi for avstemning! Alle som vil kan stemme i hver kategori.
Avstemningene er åpne frem til 12. april, og 14. april kunngjør vi vinnerne!

Takk til arrangørane og lukke til!

Sesongstart :)

2011-03-16T11:43:00.000+01:00

Endeleg er sesongen her.. Eg visste ikkje ein gong at den kom så innmari fort, men plutseleg kjente eg at NO er det på tide! :) Sååå godt med årets første frappe! Ja, den har sikkert mange namn, men her i huset heiter altså espresso, mjølk og knuste isbitar frappe. Og det er både min og Storesøster sin kaffefavoritt.. ;)

Grunnen til at lysta på denne kalde kaffedrikken er så stor akkurat no, er berre det at våren er her!

Og det må jo feirast! Greit, så har vi enno sparkføre i gata vår, men det varer nok ikkje lenge.. ;)

Eg har trilla tur i dag, og ELSKAR sola som varmar meg med strålane sine,

himmelen som har den mest vidunderlege, blå fargen,

lyden av fuglane og vatnet som drypp... Deilig!

Storesøster gjekk bort til vinduet sitt i berre nattkjolen i dag tidleg, løfta på gardinene,

kikka ut og opna vinduet. Så vart ho ståande å lytte ei lita stund, før ho plystra ein liten trudelutt.

Berre fordi fuglane gjorde det, og ho ville vere med på moroa. Herleg!

Espresso er ikkje det eg drikk mest av. Eg må liksom ha ein god dose mjølk oppi.

Men likevel kjenner eg godt kva som er god og mindre god og kjip espresso...

Vi har kaffemaskin og kvern frå Gaggia, og får nyydeleg kaffe!

Den knallrosa duken er på bordet, og eg kjenner meg litt kreativ i dag.

Skal sjå om eg får utløp for kreativiteten ganske straks! :)

Ha ein fortreffeleg onsdag!